មន្ត្រីជាន់ខ្ពស់ក្រសួងពាណិជ្ជកម្មកម្ពុជាចូលរួមសម្ពោធពិព័រណ៍នាំចូលអន្តរជាតិចិនលើកទី៣ នៅទីក្រុងសៀងហៃ តាមរយៈប្រព័ន្ធវីឌីអូអនឡាញ

វិទ្យុជាតិកម្ពុជា៖ លោកចេម ហួត 

ភ្នំពេញ៖ កាលពីរាត្រីថ្ងៃទី០៤ ខែវិច្ឆិកា ឆ្នាំ២០២០ ឯកឧត្តម ឈួន ដារ៉ា រដ្ឋលេខាធិការក្រសួងពាណិជ្ជកម្ម តំណាង ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានដឹកនាំប្រតិភូពាណិជ្ជកម្មកម្ពុជាចូលរួម “ពិធីសម្ពោធពិព័រណ៍នាំចូលអន្តរជាតិចិនលើកទី៣ (The 3rd China International Import Expo) និងវេទិកាសេដ្ឋកិច្ចអន្តរជាតិ (Hongqiao International Economic Forum)” នៅទីក្រុងសៀងហៃ ប្រទេសចិន ដែល

ប្រព្រឹត្តទៅតាមរយៈប្រព័ន្ធវីឌីអូអនឡាញ ក្រោមអធិបតីភាព ឯកឧត្តម ហាន ចឹង ឧបនាយករដ្ឋមន្រ្តីចិន (Vice-Premier HAN Zheng) និងថ្លែងសុន្ទរកថាបើកតាមប្រព័ន្ធវីឌីអូដោយ ឯកឧត្តម ស៊ី ជីនភីង ប្រធានរដ្ឋចិន និងមានការចូលរួមពី នាយករដ្ឋមន្រ្តី ឧបនាយករដ្ឋមន្រ្តី និងរដ្ឋមន្រ្តី នៃបណ្តាប្រទេសនានានៅក្នុងតំបន់ និងពិភពលោក នេះបើតាមការចេញផ្សាយរបស់ក្រសួងពាណិជ្ជកម្មកម្ពុជា។

ប្រភពថា នេះជាលើកទីបីហើយ ដែលកម្ពុជាបានចូលរួមក្នុងព្រឹត្តិការណ៍ពិព័រណ៍នាំចូលអន្តរជាតិចិនដ៏ធំនេះ។ កាលពីឆ្នាំ២០១៩កន្លងទៅ កម្ពុជា បានទទួលធ្វើជា “ប្រទេសកិត្តិយស” ក្នុងព្រឹត្តិការណ៍នេះ ដោយបានចូលរួមក្នុងកិច្ចប្រជុំនិងវេទិកាសេដ្ឋកិច្ចសំខាន់ៗ ដឹកនាំក្រុមហ៊ុនឯកជនធំៗចូលរួម និងមានការរៀបចំពន្លាជាតិតាមរចនាបទខ្មែរទំហំ ១៣៦ម៉ែត្រការ៉េ ដើម្បីផ្សព្វផ្សាយពីសក្តានុពលវិនិយោគ ពាណិជ្ជកម្ម ទេសចរណ៍ និងវប្បធម៌ជាតិ ផងដែរ។ សម្រាប់ឆ្នាំ២០២០នេះ ដោយសារ

តែបញ្ហាជំងឺឆ្លងកូវីដ-១៩ កម្ពុជា ក៏ដូចជាបណ្តាប្រទេសផ្សេងទៀត មិនអាចរៀបចំពន្លាជាតិ និងដឹកនាំគណៈប្រតិភូចូលរួមផ្ទាល់ទេ គឺអាចចូលរួមតែវិស័យឯកជនដែលមានដៃគូនិងផលិតផលស្រាប់នៅប្រទេសចិន និងតំណាងអគ្គកុងស៊ុលកម្ពុជាប្រចាំនៅទីក្រុងសៀងហៃ ប្រទេសចិនតែប៉ុណ្ណោះ។

ផ្អែកតាមប្រភពដដែល នៅក្នុងឱកាសនោះ ប្រធានរដ្ឋចិនបានស្វាគមន៍ប្រទេសចូលរួមទាំងអស់ ហើយបានប្រកាសពីភាពជោគជ័យរបស់ប្រទេសចិនចំពោះការអនុវត្តនូវវិធានការណ៍ជំរុញពាណិជ្ជកម្ម ជាពិសេសការពង្រីកការនាំចេញ-នាំចូលផលិតផលនិងសេវាកម្មគ្រប់ប្រភេទ ដែលឯកឧត្តមបានលើកឡើងកាលពីឆ្នាំទៅ។ ឯកឧត្តម បានជំរុញឲ្យប្រទេសទាំងអស់ ចូលរួមសហការគ្នាប្រយុទ្ធប្រឆាំងនិងដោះស្រាយបញ្ហាប្រឈមរួមនានា តាមរយៈការបន្តពង្រឹងកិច្ចសហប្រតិបត្តិការ និងការទំនាក់ទំនងគ្នាដោយបើកចំហរ ហើយប្រទេសចិន នឹងចូលរួមយ៉ាងសកម្មបំផុត ដើម្បីជំរុញឲ្យមានអនាគតដ៏ត្រចះត្រចង់មួយសម្រាប់មនុស្សជាតិទាំងមូល ក្នុងគ្រាដែលពិភពលោកជួបនឹងបញ្ហាជំងឺឆ្លងកូវីដ-១៩ នៅឡើយ។ 

ឈរលើយុទ្ធសាស្រ្តបើកចំហរ ឯកឧត្តមប្រធានាធិបតីចិន បានស្នើដល់ប្រទេសទាំងអស់រួមសហការគ្នាអនុវត្តនូវកិច្ចសហប្រតិបត្តិការសំខាន់ៗបី៖ 

១-ប្តេជ្ញាបើកចំហរសម្រាប់កិច្ចសហប្រតិបត្តិការដែលធ្វើឲ្យមានផលប្រយោជន៍ដល់គ្នា

២-ប្តេជ្ញាបើកចំហរសម្រាប់កិច្ចសហប្រតិបត្តិការដែលមានការទទួលខុសត្រូវរួមគ្នា

៣-ប្តេជ្ញាបើកចំហរសម្រាប់កិច្ចសហប្រតិបត្តិការដែលធ្វើឲ្យមានអភិបាលកិច្ចល្អដល់គ្នា។

នៅក្នុងជំហានបន្ទាប់ ប្រទេសចិន នឹងបន្តប្រកាន់ខ្ជាប់នូវយុទ្ធសាស្រ្តបើកចំហរ កិច្ចសហប្រតិបត្តិការ និងសាមគ្គីភាព ដើម្បីលទ្ធផលឈ្នះ-ឈ្នះទាំងអស់គ្នា។ យើង នឹងពង្រីកការបើកចំហរគ្រប់ជ្រុងជ្រោយដោយមិនងាករេ និងបើកច្រកដ៏មានប្រសិទ្ធភាពជាច្រើនទៀត ដើម្បីតភ្ជាប់ទីផ្សារក្នុងស្រុកនិងក្រៅស្រុក ក៏ដូចជាចែករំលែកទីផ្សារនិងដោះដូរគ្នានូវប្រភពធនធាននិងផលិតកម្មជាច្រើនមុខ ក្នុងទិសដៅជំរុញទីផ្សារចិនចូលក្នុងទីផ្សារមួយសម្រាប់ពិភពលោក ទីផ្សារមួយសម្រាប់ការចែករំលែកទាំងអស់គ្នា និងជាទីផ្សារមួយដែលងាយស្រួលអាចចូលរួមបានគ្រប់គ្នា៕