ឯកឧត្តម សាយ សំអាល់ ជួបពិភាក្សាការងារជាមួយប្រធានធនាគារអភិវឌ្ឍន៍អាស៊ី (ADB)

AKP ភ្នំពេញ ថ្ងៃទី១២ ខែមីនា ឆ្នាំ២០២០ — នារសៀលថ្ងៃពុធ ៣រោច ខែផល្គុន ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី១១ ខែមីនា ឆ្នាំ២០២០ ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន បានអនុញ្ញាតឱ្យប្រតិភូធនាគារអភិវឌ្ឍន៍អាស៊ី (ADB) ដឹកនាំដោយ លោក JIANGFENG ZHENG ប្រធានធនាគារអភិវឌ្ឍន៍អាស៊ីប្រចាំតំបន់អាស៊ីអាគ្នេយ៍ ចូលជួបសម្ដែងការគួរសម និងពិភាក្សាការងារ នៅទីស្តីការក្រសួង។

ប្រភពពីក្រសួងបរិស្ថានបានឱ្យដឹងបន្តថា នៅក្នុងជំនួបនេះ លោក JIANGFENG ZHENG បានលើកឡើងពីគម្រោងជំនួយប្រទេសមហាអនុតំបន់ទន្លេមេគង្គ សម្រេចនូវកំណើន និងការអភិវឌ្ឍប្រកបដោយចីរភាព តាមរយៈវិស័យកសិកម្ម និងការគ្រប់គ្រងធនធានធម្មជាតិ កែលម្អលក្ខខណ្ឌជីវភាពរស់នៅក្នុងតំបន់ទីក្រុង និងតំបន់ជនបទ ហេដ្ឋារចនាសម្ព័ន្ធ ថាមពលកកើតឡើងវិញ និងការអភិវឌ្ឍវិស័យអប់រំ និងជំនាញ។

ក្នុងឱកាសនេះ ឯកឧត្តមរដ្ឋមន្ត្រី សាយ សំអាល់ បានសម្ដែងនូវការស្វាគមន៍យ៉ាងកក់ក្តៅចំពោះគណៈប្រតិភូ ADB ដែលបានមកបំពេញទស្សនកិច្ចនៅកម្ពុជា និងរាយការ ណ៍ជូនអំពីផែនការយុទ្ធសាស្រ្តថ្មី របស់ ADB HQ លើវិស័យបរិស្ថានរបស់ប្រទេសកម្ពុជា។ ឯកឧត្តមរដ្ឋមន្ត្រី បានថ្លែងអំណរគុណដល់ធនាគារ ADB ដែលក្នុងពេលកន្លងមក ក៏ដូចជាបច្ចុប្បន្ន បានធ្វើកិច្ចសហប្រតិបត្តិការយ៉ាងជិតស្និទ្ធជាមួយរាជរដ្ឋាភិបាលកម្ពុជា។

ឯកឧត្តម សាយ សំអាល់ បានលើកឡើងពីចំណុចសំខាន់ៗជាច្រើន រួមមាន ៖ការគ្រប់គ្រងធនធានធម្មជាតិ ការអភិរក្សជីវៈចម្រុះ ជាពិសេសការបោះបង្គោលព្រំដីតំបន់ការ ពារធម្មជាតិ និងមធ្យោបាយសម្រាប់ការល្បាតជាដើម។ ជាមួយគ្នានេះ ឯកឧត្តមរដ្ឋមន្រ្តីបានលើកឡើងពីការតាំងចិត្តរបស់ក្រសួងបរិស្ថានក្នុងការលើកកម្ពស់ការយល់ដឹងអំពីបរិ ស្ថាន ជាពិសេសការថែរក្សាសុខភាព ក៏ដូចជាការធ្វើអនាម័យបរិស្ថាន តាមរយៈការផ្តល់ជូនធុងចម្រោះទឹកស្អាតនៅតាមសាលារៀន។ ចំពោះការកិច្ចគាំពារបរិស្ថានវិញ ឯកឧត្តមរដ្ឋមន្រ្តីបានលើកឡើងពីការពង្រឹងលើការគ្រប់គ្រងសំណល់រឹង សំរាម ដើម្បីឱ្យទីក្រុងស្អាត មានសោភណភាព និងផាសុកភាព។ ក្នុងផ្នែកនេះដែរ ឯកឧត្តម សាយ សំអាល់ បានបង្ហាញពីគម្រោងកិច្ចសហប្រតិបត្តិការជាមួយដៃគូដើម្បីរៀបចំទីលានចាក់សំរាម ដែល មានការគ្រប់គ្រងសំរាមឱ្យបានត្រឹមត្រូវ តាមស្តង់ដាអនាម័យខ្ពស់នៅតាមរាជធានីខេត្តមួយចំនួនផងដែរ។ នៅក្នុងជំនួបនេះដែរ ឯកឧត្តមរដ្ឋមន្រ្តី ក៏បានបញ្ជាក់ជូនពីគម្រោងរៀបចំទីក្រុងជាទីក្រុងវ័យឆ្លាត (Smart City) នៅកម្ពុជាផងដែរ ៕

ដោយ ពេជ្រ ណារិទ្ធ