កិច្ចប្រជុំលើកទី១ក្រុមប្រឹក្សាភិបាលប្រតិបត្តិនៃកម្មវិធីសម្ព័ន្ធភាពប្រែប្រួលអាកាសធាតុកម្ពុជា​ដំណាក់កាលទី៣

AKP ភ្នំពេញ ថ្ងៃទី១២ ខែកុម្ភៈ ឆ្នាំ២០២០–កម្មវិធីសម្ព័ន្ធភាពប្រែប្រួលអាកាសធាតុកម្ពុជា ដែលហៅកាត់ថា CCCA3 បានរៀបចំកិច្ចប្រជុំលើកទី១ក្រុមប្រឹក្សាភិបាលប្រតិបត្តិរបស់ខ្លួន ក្រោមអធិបតីភាព ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានក្រុមប្រឹក្សាភិបាល កម្មវិធី CCCA3 នៅថ្ងៃអង្គារ ៣រោច ខែមាឃ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី១១ ខែកុម្ភៈ ឆ្នាំ២០២០ នៅទីស្តីការក្រសួងបរិស្ថាន។

ប្រភពព័ត៌មានពីក្រសួងបរិស្ថានបានឱ្យដឹងបន្តថា កិច្ចប្រជុំលើកទី១ក្រុមប្រឹក្សាភិបាលប្រតិបត្តិរបស់ខ្លួន នៃកម្មវិធីសម្ព័ន្ធភាពប្រែប្រួលអាកាសធាតុកម្ពុជានោះ មានការចូលរួមពីសមាជិកក្រុមប្រឹក្សាភិបាលប្រតិបត្តិ តំណាងពីក្រសួងសេដ្ឋកិច្ច និងហិរញ្ញវត្ថុ ក្រសួងបរិ ស្ថាន ក្រសួងអភិវឌ្ឍន៍ជនបទ ក្រសួងសាធារណការ និងដឹកជញ្ជូន ក្រសួងអប់រំ យុវជន និងកីឡា ក្រសួងរ៉ែ និងថាមពល និងដៃគូអភិវឌ្ឍន៍រួមមាន៖ សហភាពអឺរ៉ុប(EU) និងកម្មវិធីអភិវឌ្ឍន៍សហប្រជាជាតិប្រចាំកម្ពុជា(UNDP) និងស្ថានទូតស៊ុយអែត (Sweden) ព្រមទាំងអ្នកសង្កេតការណ៍ជាតិ និងអន្តរជាតិពីក្រសួង-ស្ថាប័នពាក់ព័ន្ធនានាផងដែរ។

ប្រភពដដែលបន្ថែមថា គោលបំណងនៃកិច្ចប្រជុំដើម្បីពិនិត្យ និងពិភាក្សាលើសមិទ្ធផលសម្រេចបានសំខាន់ៗក្នុងឆ្នាំ២០១៩ និងទិសដៅបន្តឆ្នាំ២០២០ ព្រមទាំងផែនការថវិកាឆ្នាំ២០២០-២០២១ ក្នុងការឆ្លើយតបនឹងបញ្ហានៃការប្រែប្រួលអាកាសធាតុនៅកម្ពុជា ជាពិសេសការគាំទ្រគម្រោងនានា និងកិច្ចខិតខំប្រឹងប្រែងរបស់ក្រសួង-ស្ថាប័នពាក់ព័ន្ធ។

នៅឯកិច្ចប្រជុំនោះឯកឧត្តម សាយ សំអាល់ បានគូសបញ្ជាក់អំពីកិច្ចសហប្រតិបត្តិការពីដៃគូអភិវឌ្ឍន៍ និងកិច្ចខិតខំប្រឹងប្រែងរបស់កម្មវិធី CCCA និងក្រសួង-ស្ថាប័ន ដើម្បីឆ្លើយតបទៅនឹងការប្រែប្រួលអាកាសធាតុ ដូចជា ការកាត់បន្ថយឧស្ម័នផ្ទះកញ្ចក់តាមវិស័យ ការលើកកម្ពស់ការយល់ដឹង និងការកាត់បន្ថយប្លាស្ទិក ការអភិវឌ្ឍទីក្រុងនិរន្តរភាព សំណង់អគារបៃតង ការបញ្ជ្រាបការប្រែប្រួលអាកាសធាតុទៅក្នុងដំណើរការថវិកាជាតិ ការសាងសង់ផ្លូវដែលធន់នឹងអាកាសធាតុ ជាដើម៕

ដោយ ពេជ្រ ណារិទ្ធ