សម្តេចអគ្គមហាពញាចក្រី ហេង សំរិន ជួបសំណេះសំណាល ជាមួយប្រជាពលរដ្ឋខ្មែរក្នុងទីក្រុងកង់បេរ៉ា និងបានជម្រាបពីការីកចម្រើនរបស់ប្រទេសជាតិ

AKP កង់បេរ៉ា ថ្ងៃទី១៦ ខែមករា ឆ្នាំ២០២០ —

បន្ទាប់ពីការចូលរួមកិច្ចប្រជុំAPPF លើកទី២៨ ក្នុងប្រទេសអូស្រ្តាលី សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា បានទទួលជួបសំណេះសំណាល សាកសួរសុខទុក្ខ និងទទួលទានអាហារជាមួយ ប្រជាពលរដ្ឋខ្មែរ និងនិស្សិតកំពុងរស់នៅ និងសិក្សានៅក្នុងទីក្រុងកង់បេរ៉ា និងរដ្ឋនៅក្បែរៗនោះ នារសៀលថ្ងៃទី១៦ ខែមករានេះ នៅស្ថានទូតខ្មែរក្នុងទីក្រុងកង់បេរ៉ា ប្រទេសអូស្រ្តាលី។

ឯកឧត្តម ចាន់ រតនា ឯកអគ្គរាជទូតកម្ពុជានៅប្រទេសអូស្រ្តាលី ប្រជាពលរដ្ឋ និស្សិតដែលបានមក បានស្វាគមន៍សម្តេច បានបង្ហាញក្តីនឹករលឹកយ៉ាងជ្រាលជ្រៅចំពោះសម្តេចប្រធានរដ្ឋសភា។ ប្រជាពលរដ្ឋបានថ្លែងអំណរគុណចំពោះសម្តេចដែលបានតស៊ូរំដោះប្រទេសជាតិចេញពីរបបខ្មែរក្រហម និងបានចូលរួមអភិវឌ្ឍន៍ប្រទេសជាតិរហូតមកដល់ពេលបច្ចុប្បន្ននេះ។

ឯកឧត្តមបានបន្តថា ប្រជាពលរដ្ឋខ្មែររស់នៅក្រៅប្រទេសសម្តែងការគំាទ្រនិងសប្បាយរីករាយ ចំពោះការរីកចម្រើន សុខសន្តិភាព ដែលកម្ពុជាទទួលបានសព្វថ្ងៃនេះ និងសូមឲ្យថ្នាក់ដឹកនាំ ពលរដ្ឋនៅក្នុងប្រទេសរួមគ្នាថែរក្សាសុខសន្តិភាពនិងការអភិវឌ្ឍជាអចិន្រ្តៃយ៍តរៀងទៅ ហើយពួកគាត់ពិតណាស់គឺមិនចង់ឃើញប្រទេសជាតិមានសង្រ្គាមដែលនាំឲ្យខ្មែរបែកបាក់គ្នា និងរត់មករស់នៅប្រទេសគេទៀតនោះទេ។

ក្នុងឱកាសជួបសំណេះសំណាលប្រកបដោយក្តីរីករាយ និងស្និទ្ធស្នាលជាមហាគ្រួសារខ្មែរនេះ សម្តេចប្រធានរដ្ឋសភា បានថ្លែងអំណរគុណដល់ពលរដ្ឋខ្មែររស់នៅក្នុងប្រទេសអូស្រ្តាលី ដែលបានទទួលស្វាគមន៍សម្តេចតំាងពីពេលមកដល់ព្រលានយន្តហោះមកម្ល៉េះ ជាមួយគ្នានេះ សម្តេចក៏បានអរគុណប្រជាពលរដ្ឋខ្មែរទាំងអស់ ដែលរស់ក្រៅប្រទេស ជាពិសេសបងប្អូនប្រជាពលរដ្ឋ ខ្មែររស់នៅអូស្រ្តាលីនេះ ដែលជានិច្ចកាលតែងគាំទ្រ ទាំងផ្នែក ស្មារតី និងសម្ភារៈដល់ប្រជាជននៅក្នុងប្រទេស ក្នុងការរួមចំណែក កសាង និងអភិវឌ្ឍប្រទេសតាំងពីដើមរៀងមក។

ជាមួយគ្នានេះសម្តេចអគ្គមហាពញាចក្រី ហេង សំរិន បានជម្រាបពលរដ្ឋខ្មែរ នៅនាយសមុទ្រពីសភាពការណ៍ជាក់ស្តែងនៅក្នុងប្រទេស ពិសេសការអភិវឌ្ឍរបស់ប្រទេសជាតិ នាពេលបច្ចុប្បន្ននេះ។

នៅក្នុងឱកាសនោះសម្តេចបានរំលឹកពីប្រវត្តិសង្រ្គាមនៅកម្ពុជា និងចលនាតស៊ូរបស់ឥស្សរជនស្នេហាជាតិ ដែលរំដោះប្រទេសជាតិចេញពីរបបខ្មែរក្រហម និងការតស៊ូកសាងជាតិ ក្រោយថ្ងៃរំដោះ ៧ មករា ១៩៧៩។

សម្តេចបានបន្តថា ហែរឆ្លងការលំបាកជាង៤០ឆ្នាំ មកនេះ កម្ពុជាបានប្រែក្លាយពីវាលពិឃាតនៃរបបប្រល័យពូជសាសន៍ ពីសមរភូមិសង្រ្គាមស៊ីវិលដ៏រ៉ាំរ៉ៃ បង្ហូរឈាម ពីការបែកបាក់ជាតិ និងបែកបាក់ទឹកដី មកជាប្រជាជាតិមួយ ដែលមានសន្តិភាព ឯកភាពជាតិ ស្ថិរភាព និងការអភិវឌ្ឍ លើគ្រប់វិស័យ ជាពិសេស ហេដ្ឋារចនាសម្ព័ន្ធរូបវន្ត ដូចជា ផ្លូវថ្នល់ បណ្តាញអគ្គិសនី រហូតដល់ជនបទដាច់ស្រយ៉ាលគ្រប់ច្រកល្ហក ប្រព័ន្ធ ធារាសាស្ត្រខ្វាត់ខ្វែង នៅគ្រប់តំបន់ ជនបទ សាលារៀន មន្ទីរពេទ្យ វត្តអារាម ត្រូវបានកសាង និង កែលំអរនៅគ្រប់ភូមិឃុំនិគមជនបទ និង ហេដ្ឋរចនាសម្ព័ន្ធរូបវន្តដទៃទៀតរាប់មិនអស់ ដែលក្នុងនោះ តំបន់ភាគច្រើនមិនធ្លាប់ មានការអភិវឌ្ឍទាល់តែសោះ នៅក្នុងរបបនយោបាយមុនៗ។

សម្តេច ហេង សំរិន ក៏បានផ្តាំផ្ញើដល់ឯកឧត្តមឯកអគ្គរាជទូតកម្ពុជានៅប្រទេសអូស្រ្តាលី និងប្រជាពលរដ្ឋទំាងអស់ ចេះជួយយកអាសាគ្នាគ្រប់ពេលវេលា មានអធ្យាស្រ័យគ្នា និងថែរក្សាឲ្យបានភាពថ្លៃថ្នូរជាពលរដ្ឋខ្មែរ៕

ដោយ ផែន រតនៈ