AKP ភ្នំពេញ ថ្ងៃទី២៩ ខែវិច្ឆិកា ឆ្នាំ២០១៩ -- តាមរយៈស្ថានទូតជប៉ុននៅកម្ពុជា រាជរដ្ឋាភិបាលជប៉ុនបានចុះហត្ថលេខាលើកិច្ច សន្យាផ្តល់ជំនួយក្នុងគម្រោងហិរញ្ញប្បទានឥតសំណង សម្រាប់អង្គការក្រៅរដ្ឋាភិបាលជប៉ុន (IVY)នៅ​កម្ពុជា នៅ​ព្រឹកថ្ងៃ​ទី២៩ ខែវិច្ឆិកា ឆ្នាំ២០១៩នេះ។ ពិធីចុះហត្ថលេខានេះបាន ប្រព្រឹត្តទៅរវាងឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូត​ជប៉ុនប្រចាំនៅកម្ពុជា និងលោកស្រី SUZUSHIMA Chihoko តំណាងអង្គការ IVY។

ឯកឧត្តម មិកាមិ ម៉ាសាហ៊ីរ៉ូ  ឯកអគ្គរដ្ឋទូត​ជប៉ុនប្រចាំកម្ពុជា បានថ្លែងថា រាជរដ្ឋាភិ បាលជប៉ុនបានបន្តផ្តល់ថវិកាប្រមាណ ៤៤ម៉ឺនដុល្លារសហរដ្ឋអាមេរិក ដល់អង្គការ IVY ខេត្ត ព្រះវិហារ ជាខេត្តដែលអង្គការកំពុងធ្វើសកម្មភាព ហើយក៏ជាខេត្តមួយក្នុងចំណោមខេត្តដែល មានអត្រាភាពក្រីក្រខ្ពស់ជាងគេនៅកម្ពុជា ដូច្នេះការកាត់បន្ថយភាពក្រីក្រមានសារៈសំខាន់ ណាស់។

ឯកឧត្តមបន្តថា នៅក្នុងខេត្តព្រះវិហារគម្រោងនេះ កំពុងតែគាំទ្រ និងខិតខំប្រឹងប្រែង ក្នុងការលើកកម្ពស់ប្រាក់ចំណូលរបស់កសិករ តាមរយៈការយកចិត្តទុកដាក់ទៅលើគ្រាប់ ស្វាយចន្ទី ដែលបានដាំដុះយ៉ាងសកម្មក្នុងរយៈពេលប៉ុន្មានឆ្នាំចុងក្រោយនេះ។ គម្រោងនេះ ដើម្បីជួយធ្វើការណែនាំដល់ការដាំដុះដំណាំសរីរាង្គដល់កសិករ និងការដឹកជញ្ជូនរួមគ្នាតាម រយៈសហគមន៍កសិកម្ម។

ឯកឧត្តមឯកអគ្គរាជទូត​បានបញ្ជាក់ថា នៅឆ្នាំនេះ អង្គការនឹងធ្វើការអនុវត្តគម្រោង ដើម្បីឱ្យសហគមន៍កសិកម្មចំនួន៦ថែមទៀត ទទួលបានវិញ្ញាបនបត្រសរីរាង្គ ហើយក៏ខិត ខំប្រឹងប្រែងបង្កើនបច្ចេកទេសរបស់កសិករតាមរយៈការណែនាំបច្ចេកទេសដាំដុះថ្មី ដូចជា ការផ្សាំកូនស្វាយចន្ទី និងកាត់មែកដែលមិនចាំបាច់ចេញ។ 

ឯកឧត្តមរំពឹងថា ប្រាក់ចំណូលរបស់កសិករនឹងកើនឡើងកាន់តែខ្លាំងដោយកសិករ គោលដៅ និងអាចដាំដុះគ្រាប់ស្វាយចន្ទី ដែលមានតម្លៃបន្ថែមទៀត គឺដំណាំសរីរាង្គប្រកប ដោយស្ថិរភាព។

លោកស្រី SUZUSHIMA Chihoko តំណាងអង្គការ IVY  បានលើកឡើងថា តាមរយៈ គម្រោងនេះ អង្គការ IVY នឹងពង្រីកគោលដៅរបស់ខ្លួននូវកសិករដាំដំណាំស្វាយចន្ទីនៅក្នុង ខេត្តព្រះវិហារ ដែលបច្ចុប្បន្នមានសរុប ១១សហគមន៍កសិកម្ម និងពង្រីកសហគមន៍កសិកម្ម ថ្មីចំនួន ៦ បន្ថែមទៀត។

លោកស្រីបានបន្តថា កាលពីឆ្នាំមុនអង្គការ IVY បានបង្រៀនស្តង់ដារសរីរាង្គដល់ កសិករដាំដំណាំស្វាយចន្ទីជិត៤០០នាក់ មកពី៥សហគមន៍កសិកម្មនៅក្នុងខេត្តព្រះវិហារ ហើយបានគាំទ្រលើការបង្កើតប្រព័ន្ធត្រួតពិនិត្យផ្ទៃក្នុងនៃក្រុមអ្នកដាំស្វាយចន្ទី។ ជាលទ្ធ ផលកសិករជាអ្នកដាំស្វាយចន្ទីចំនួន២៥៦នាក់ ដែលមានផ្ទៃដីសរុប៥៦០ហិកតា បានទទួល វិញ្ញាបនបត្របញ្ជាក់សរីរាង្គ ស្របតាមគោលការណ៍ច្បាប់របស់សហកមន៍អឺរ៉ុប និងសហរដ្ឋ អាមេរិក​ដែលឈានទៅរកការនាំចេញដំបូងគេនៅកម្ពុជា នូវគ្រាប់ស្វាយចន្ទីដែលបានបញ្ជាក់ សរីរាង្គ។

ជាមួយនេះដែរ ថ្នាក់ដឹកនាំសហគមន៍កសិកម្មចំនួន ២នាក់ បានចូលរួមទស្សនកិច្ចពិ ព័រណ៍ពាណិជ្ជកម្មសរីរាង្គអន្តរជាតិមួយនៅទីក្រុងបាងកក ប្រទេសថៃ ហើយកសិករគំរូចំនួន ៤នាក់ បានចូលរួមទស្សនកិច្ចកសិដ្ឋានសរីរាង្គមួយនៅឥណ្ឌាខាងត្បូង ដើម្បីពង្រីកចំណេះដឹង និងការយល់ដឹងរបស់ពួកគេផងដែរ។ បច្ចុប្បន្ននេះធ្វើឱ្យផលិតកម្មគ្រាប់ស្វាយចន្នីរបស់កម្ពុជា ទទួលបានការចាប់អារម្មណ៍យ៉ាងខ្លាំងពីជាតិ និងអន្តរជាតិ៕