Connect with us
[better-ads type='banner' banner='357920' ]

ព័ត៌មានជាតិ

បទយកការណ៍៖ លោក កង វុត្ថា ផ្តើមចេញពីគំនិតស្រឡាញ់បរិស្ថាន ក្លាយជាអ្នកបង្កើត​សិប្បកម្ម​ខ្នាតតូច ផលិតធ្យូងអ​នាម័យ​កែច្នៃពី​កា​ក​សំ​ណ​ល់

Published

on

AKP កំពង់ស្ពឺ ថ្ងៃទី២៨ ខែវិច្ឆិកា ឆ្នាំ២០១៩ — ស្របពេលដែលបញ្ហាបំពុលបរិស្ថាន​កំពុ​ង​ក្លា​​យ​​ជាបញ្ហាសកលដែលប្រទេសកម្ពុជា ក៏ដូចជា ប្រជាជាតិទូទាំងសកលលោកបានយក​ចិត្ត​​ទុកដាក់យ៉ាងខ្លាំង ដោយបានបំផុសគំនិតឱ្យ​លោក កង វុត្ថា ស្រាវជ្រាវតាមបណ្តាញសង្គម ​Youtube ​ដើម្បីសិក្សាឈ្វេងយល់ពីបច្ចេកទេសកែច្នៃ​កាកសំណល់ធ្វើជាធ្យូងអនាម័យដែល​អា​ច​ប្រើ​​ប្រា​​ស់ជំនួសធ្យូងព្រៃធម្មជាតិបាន។

លោក កង វុត្ថា សម្បុរខ្មៅស្រអែម មានមាឌធំក្រអាញ​សក់រួញអង្គារដីចូលចិត្ត​ពាក់មួក​កាតិប​ក្នុងពេល​ត្រួតពិនិត្យការងារបានឱ្យដឹងថា បច្ចេកទេសធ្វើធ្យូងអនាម័យ​នេះ​​លោកបាន​​ព្យាយាមស្រាវជ្រាវខ្លួនឯង តាមរយៈ​ប្រ​ព័ន្ធបណ្ដាញទំនាក់ទំនងសង្គមYoutubeមើលពីរបៀប​ធ្វើ ហើយ​យ​ក​ម​ក​អ​នុ​វ​ត្តន៍ជាក់ស្តែង​ប​ន្ថែ​មទៀត ទម្រាំ​បានលទ្ធផលជាធ្យូងដែលលោកត្រូវ​ចំណាយពេលវេលាយ៉ាង​ច្រើ​ន។ លោកបានបន្ដថា ការបង្កើតសិប្បកម្មខ្នាតតូច ផលិតធ្យូង​អនាម័យនេះ គឺមានភាគហ៊ុនជាមួយមិត្តភក្តិម្នាក់ទៀត ដែលធ្លាប់រស់នៅកម្សត់កម្រជាមួយគ្នា និងបានបង្កើតសិប្បកម្ម​ផលិតធ្យូងអនាម័យដំ​បូ​ង​ក្នុងទឹកប្រាក់វិនិយោគប្រហែលខ្ទង់ ៨ម៉ឺន​ដុល្លារ​អាម៉េរិក សម្រាប់ធ្វើការ​រៀបចំ​ដំ​ណើ​​រការ ស​ង្វា​​ក់ផលិតកម្ម និង​ចំណាយលើការស្រា​វ​ជ្រាវជាបន្តបន្ទាប់ដូចជា​រកទិញម៉ាស៊ីន និងឧបករណ៍កែច្នៃ​ផ្សេង​ៗ​​។ ​ក្រោយៗមកទៀត​លោ​ក​​​​​ក៏ចាប់ផ្ដើមប​ង្កើនទុនបន្ថែមទៀតទៅតាមតម្រូវការជាក់​ស្តែ​ង​។

នីយាយមួយៗក្នុងទឹកមុខរាងមាំ បង្ហាញការតាំងចិត្តដ៏ខ្ពស់ ស្ថាបនិកធ្យូងអនាម័យ កង វុត្ថា បានរម្លឹកពីគំនិតអាជីវកម្មថា “ដោយសារតែ យើងឃើញថា ស្រុក​ខ្មែ​រ​យើ​ង​​វាស​ប្បូ​រ​ធន​ធានធម្មជាតិជា​ពិ​សេ​សគឺកាកសំណល់ច្រើន​ គេយកទុកចោ​លព្រោងព្រា​ត​ពាសពេ​​​ញ​វាល ហើយចេញពីដំបូង​មក យើងចង់សម្អាតអាកាកសំណល់បែបនឹង ដែ​ល​គេ​ចោ​ល​ហើ​យ​​​មើ​ល​​​ទៅ​វា​អត់ល្អដល់បរិ​ស្ថា​ន។ មួយទៀតយើងចង់យកអាកាកសំណល់នឹង ធ្វើ​កា​រប្រើ​ប្រា​ស់​​ឡើ​ង​វិញ កុំឱ្យគាត់ចោ​ល​ខ្ជះ​ខ្ជាយបែបនឹង អញ្ចឹងទើបពួកខ្ញុំចាប់ផ្តើមសិក្សាស្រា​វជ្រាវមក ហើ​​យ​ចា​ប់​ផ្តើ​ម ដើរប្រមូ​ល​កា​ក​​សំណល់ដែលគេចោល ដូចជាត្រឡោកដូង នៅ​តា​ម​​ទីផ្សារ ឬ​តា​​​ម​ផ្ទះ​ដែ​ល​គេប្រើប្រាស់​ហើ​យ​ទុកគ​រចោលអញ្ចឹងទៅមើលទៅវាអា​ចបង្កើត​ឱ្យ​មា​ន​ភា​ពកខ្វក់​ដល់លំ​នៅ​ឋា​នផង។ ទន្ទឹមនេះ ពួកយើង​ក៏ដើរទៅប្រមូលយកវា​តាមកន្លែ​ងប្រជាពលរដ្ឋ​រ​ស់​នៅ​នឹ​ង យើ​ង​ទិ​ញ  គា​ត់ជូ​នជា​ថ​វិ​កា​ទៅ​គាត់ ដើម្បីឱ្យគាត់បាន​ស្អា​​តកន្លែងគាត់ផង គាត់​បា​ន​ចំ​ណូ​ល​ចូ​លផង ហើយយើ​ង​យ​ក​ម​ក​កែច្នៃ។”

លោកបានបន្ដទៀត ការបង្កើតធ្យូងអនាម័យនេះគឺយើង​ចង់ជួយថែរក្សាបរិស្ថាន ដោយ​សារឃើញថា ធ្យូងព្រៃធម្មជាតិបានធ្វើឱ្យប៉ះពាល់ដល់ការបំផ្លាញបរិស្ថាន ដូចយើងកាប់ បំផ្លាញព្រៃឈើ អញ្ចឹងចង់ ឬមិនចង់ពេលអនាគតទៅ ព្រៃឈើនឹងវានឹងអស់ វាអាច​នឹ​ង​ធ្វើ​ឱ្យប៉ះពា​ល់ដ​ល់​បរិស្ថានធនធានធម្មជាតិរបស់យើង។ លោកបានបន្ថែមថា “អញ្ចឹងយើងចាប់​ផ្តើមកែច្នៃកាកសំ​ណ​​ល់ ដូចជាសំរាម ជំនួសធ្យូងព្រៃវិញ ព្រោះតម្រូ​វ​កា​រ​នៃ​ការប្រើប្រាស់​ធ្យូង​យើងឃើញហើយ ហាងសាច់អាំងក៏​​ត្រូវការដុតធ្យូង អញ្ចឹងយើង​ជួ​យសម្រួលដល់ការប្រើ​ប្រាស់​របស់គា​ត់ ដែលនឹ​ងជួ​យ​ប​រិ​ស្ថា​ន​យើ​ង​ផង អញ្ចឹងកាកសំណល់ទាំង​អ​ស់​នឹ​ងយើង​ប្រមូលយកមក យើងចាប់ផ្តើមធ្វើ​​ជាក​ត្តា​មួ​យ​ជួយកាត់បន្ថយការកាប់ព្រៃឈើ​ដើ​ម្បី​ដុតយក ធ្យូងធម្មជាតិ”។

បើតាមលោក ឈៀក មជ្ឈិម ប្រធានទីផ្សារនៅក្រុមហ៊ុន ខេមបូឌាន ស៊ីងម៉េង ធេ​លី​មី​ឌា​ជាមិត្តភក្តិធ្លាប់រៀនសូត្រជាមួយគ្នាបានឱ្យដឹងថា លោក កង វត្ថា ចូល​ចិ​ត្ត​ជំ​នា​​​ញ​​ប​ច្ចេ​ក​ទេ​ស​ណាស់ ជាពិសេសការដំឡើង Soft Ware និង Hard Ware កុំព្យូទ័រ។ ដោ​យ​កា​រ​ស្រ​​ឡា​ញ់​លើ​ការ​ស្រាវជ្រាវ លោក វុត្ថា នៅតែបន្តការស្រា​វជ្រាវ។ ជាមួយគ្នានេះ លោក វុត្ថា បានទៅ​ធ្វើ​ការនៅតាមក្រុមហ៊ុនឯកជន និងអង្គការសង្គមស៊ីវិលមួយចំ​នួ​ន​ក​ន្ល​ង​ម​ក​ក៏​លោ​ក​នៅតែស្រា​វ​ជ្រាវ​ដែរ។

ដោយមានចំណង់ចំណូលចិត្តជាអ្នកស្រាវជ្រាវតាមអ៊ីនធឺណេតតាំងពីនៅជាសិស្សផងនោះ លោក កង វុត្ថា បាន​ប្រាប់ទី​ភ្នាក់​ងារ​សារ​ព័ត៌​មាន​ក​ម្ពុ​ជា​A​K​P​ដែ​ល​បា​នសួរថា តើលោក​ចេះធ្វើធ្យូងអនាម័យ និងឈ្វេងយល់ពីផលប៉ះពាល់បរិស្ថានពីនរណា? លោ​ក ​វុត្ថា បានឆ្លើយ​ដោយមិនបង្អង់ថា «អត់មាននរណាពន្យល់ទេ ដោ​យ​សា​រ​យើ​ងឃើ​ញ​ជា​ក់​ស្តែងថា បើសិនជា​ប្រជាពលរដ្ឋគាត់ផ្លា​ស់ប្តូរគោលដៅនៃការប្រើ​ប្រាស់រ​បស់​គាត់​ហើយ​មក​ប្រើ​ប្រាស់ ធ្យូ​ង​អនាម័យច្រើន អញ្ចឹងធ្យូងព្រៃធម្មជាតិនឹងត្រូវបានកា​ត់​ប​ន្ថ​យ​ហើ​យ ហើយ​ពួ​កគាត់ក៏​អ​ត់​​ត្រូវ​ការកាប់ព្រៃដើម្បីយកមកធ្វើធ្យូងទៀតដែរ។ ពួក​គា​ត់​អា​ច​ប​ង្កើ​ន​កា​រ​ដាំដុះ ឧទា​ហ​រណ៍ ឥឡូវដាំដូង យកត្រឡោកដូងមកធ្វើធ្យូង ឬក៏គា​ត់អា​ចដាំ​ឫ​ស្សី​​ដើម្បីយកឫស្សី​ មក​ធ្វើ​ធ្យូ​​ង​ឬស្សី ធ្យូងឫស្សីក៏វាជាចំណែកមួយនៃធ្យូ​ងដែ​ល​មា​ន​​ត​​ម្លៃថ្លៃ​នៅ​ក្នុ​ង​ទី​ផ្សា​រ ឬមួ​យ​គា​ត់​អា​ច​ធ្វើការកែច្នៃពីការកាប់ព្រៃឈើ។” លោកបានបន្ថែមថា បើប្រជាពលរដ្ឋងាក​មកដាំព្រៃឈើ ប្រភេទ​ព្រៃ​កែ​​​ច្នៃ​វិ​ញ​ដើ​ម្បីយក​ឈើ​នឹងយកមកកែច្នៃ​ធ្វើជាវ​ត្ថុធាតុដើមនៃការផលិតធ្យូង​នេះ វិញ ឧទាហ​រ​ណ៍ ​​ដាំដើ​ម​អា​​កា​ស្យា ដាំ​ដើ​មប្រេងខ្យល់ ដើម្បីយកមកកែច្នៃវិញអានឹងវាល្អ ជា​ជាងទៅកាប់​បំ​ផ្លា​​ញ​ព្រៃ​ឈើ​ធម្ម​ជា​តិ។

ទោះបីការដំណើរការបានពីរឆ្នាំកន្លងមកហើយ សិប្បកម្មធ្យូងអនាម័យ ​BF នេះ មិន​   ដែ​ល​បាន​ទទួលការបណ្តុះបណ្តាលពីខាងមន្ត្រីបរិស្ថាន មន្ត្រីខាងសិប្បកម្ម ឬអង្គការក្រៅ​​រ​ដ្ឋា​ភិ​​បា​​ល​ណាមួយឡើយ។ ប៉ុន្តែម្ចាស់សិប្បកម្មធ្យូងអនាម័យBF នៅតែបង្ហាញទឹកចិត្ត​រីករាយក្នុង​កា​រ​ស​ហការជាមួយមន្ត្រីជំនាញ ប្រសិនបើ​មានជំនាញបច្ចេកទេស​ណាមួយ អាចជួយ​ផ្តល់​កា​​រ​បណ្តុះបណ្តា​លបន្ថែមអំពីរបៀបកែច្នៃធ្យូងអនា​ម័យដែលមានប្រយោជន៍ជួយទុបស្កាត់ផ​ល​ប៉ះ​ពា​ល់​បរិស្ថាន ឬជួយផ្តល់ឱ្យជាបច្ចេកទេស ធ្វើម៉េចឱ្យការផលិតធ្យូង​ដំណើរការវា​កាន់​តែ​ល្អ​ទៀ​ត សិប្បកម្មធ្យូងអនាម័យBF រីករាយសប្បាយក្នុងការសហការ។

ឆ្លើយតបការលើកឡើងរបស់ម្ចាស់សិប្បកម្មធ្យូងអនាម័យBF នេះដែរ ឯកឧត្តម នេត្រ ភក្រ្តា រដ្ឋ​លេ​ខាធិការ និងជាអ្នកនាំពាក្យក្រសួងបរិស្ថាន​បានមានប្រសាសន៍ថា ប្រសិនបើ​សិប្បកម្មនេះ​ស្នើ​សុំកា​រប​ណ្តុះ​​ប​ណ្តាល​ផ្នែកណា​មួ​យ​នោះ ​ក្រសួងនឹងពិនិត្យមើលជាក់​ស្តែង លើ​ក្រប​ខ័​ណ្ឌ​ប​ច្ចេ​​​ក​ទេ​សថា​តើ​ក្រសួងមា​ន​ ឬអត់ ឬ​មួ​យ​ក៏ពា​ក់ព័ន្ធជាមួយក្រសួងស្ថាប័ន​ផ្សេង​ច្រើនជាង​ក្រសួ​ង​​បរិស្ថាន។ ឯកឧត្តមបានគូសបញ្ជាក់ថា   “ខ្ញុំ​ជឿ​ថា គា​ត់​អាចទាក់ទងមក​ក្រ​សួ​ង​បរិ​ស្ថា​ន​បា​ន ​ហើ​យយើងអាចពិនិត្យ​ប្រ​​សិ​​នបើម​ន្ត្រី​រ​ប​ស់​យើ​​ង​មា​ន​ជំនាញខាង​នឹ​ង​គឺយើ​ង​អា​ច​ជួ​យ​ផ្ត​ល់​ឱ្យ​”។ ឯកឧត្តមរដ្ឋលេខាធិការបានបន្ថែមថា ក្រសួងបរិស្ថាន​គាំទ្ររាល់ការវិនិ យោគ ឬការ   គិ​ត​គូរ​​កែ​​ច្នៃ​នូវផលិ​ត​ផលដែលមានមេត្រីភាពបរិស្ថាន។

ដោយឈរជិតគំនរត្រឡោកដូងសម្រាប់ប្រើប្រាស់ជាវត្ថុធាតុដើមផលិតធ្យូង លោក ហុង ជាលីម ជាអ្នកមើលការខុសត្រូវផ្ទាល់ក្នុងសិប្បកម្មធ្យូងអនាម័យBF បានបង្ហាញថា ការ​ធ្វើ​​ធ្យូ​​ង​ច្នៃ​ពីកាកសំណល់​នេះមិនលំបាកឡើយសំខាន់គឺអ្នក​ផលិតមានឆន្ទៈខ្ពស់ព្រោះ​សង្វាក់​​ផលិត​ផ​លិ​​​តកម្មនេះទាមទារឱ្យមានភាពអំណត់ទម្រាំសម្រេចបានជាធ្យូងចេញលក់​លើ​ទីផ្សារ។

បើតាមការចង្អុលប្រាប់ត្រួសៗពី លោក ហុង ជាលីម ជំហានដំបូងនៃការ​ផ​លិ​ត​ធ្យូ​​ង   ​អ​នា​ម័​យ​​គឺត្រូវយកត្រឡោកដូងដុតឱ្យខ្លោចសិន  បន្ទាប់មកកិនឱ្យម៉ត់និងបញ្ចូលទៅ​តា​ម​​​ម៉ា​ស៊ីន​ពី​រ​បី​ដំ​ណាក់កាលផ្សេងគ្នាដើម្បីលាយវត្ថុធាតុដើម្បីផ្សេ​ងៗមុននឹងចូលទៅឡ​សម្ងួ​ត​។

ស្ថាបនិកសិប្បកម្មធ្យូងអនាម័យ BF លោក កង វុត្ថា មានដើមកំណើត នៅខេត្ត​ពោធិ៍សាត់ ហើយទម្រាំបានក្លាយម្ចា​ស់​សិ​ប្ប​ក​ម្ម​បានចំណាយពេលយ៉ាងច្រើនទាំងការសិក្សា​ស្រាវជ្រាវបច្ចេកទេសនិ​ងទីតាំងស​ម​ស្រ​ប​មួ​យ​​ដែលដែលងាយស្រួលរកវត្ថុធាតុដើម ការដឹក ជញ្ជូនផលិតផល​ចេញទៅលក់ និងកន្លែង​ដែ​ល​​​មា​​ន​​បរិយាកាសបែបធម្មជាតិ ស៊ីសង្វាក់គ្នា ទៅនឹងឈ្មោះសិប្ប​កម្មដែលមានតួនាទីកែ​ច្នៃកា​ក​សំ​​ណ​ល់ដើម្បីកុំឱ្យប៉ះពាល់បរិស្ថាន។

បច្ចុប្បន្នសិប្បកម្មផលិតធ្យូងអនាម័យ BF មានទីតាំងស្ថិតនៅភូមិអូរអង្គំ ឃុំអមលាំង ស្រុកថ្ពង ខេត្តកំពង់ស្ពឺ ដែលអំណោយផលបំផុតសម្រាប់ផលិតកែច្នៃកាកសំណល់ពីព្រោះ​ទី​នោះ​អាចដឹកកាកសំណល់ពីប្រជុំជននានា ឬកាកសំណល់ពីធម្មជាតិមានស្លឹកឈើ កាក​​អំ​ពៅ ពី​រោង​ច​ក្រស្ក​រសមាននៅ​ជិតនោះស្រាប់ ឬអាចដាំឫស្សីយកមកកែច្នៃជាធ្យូងជំនួសព្រៃឈើ​ធម្ម​​ជា​តិ​បា​​ន។

ជាមួយនឹងការប្រកាសជំហរពង្រីកសង្វាក់ផលិតកម្មចេញពីកាកសំណល់ឱ្យបានច្រើនប្រ​ភេទនោះលោក វុត្ថា មានជំនឿចិត្តថា “ចង់ ឬមិនចង់ យើងក៏បានគិតខ្លួនឯងដែរ​ថា វិស័​យ​មួ​យ​នេះវាពិតជាជួយហើយ យើងមានឆន្ទៈក្នុងការជួយនៅក្នុងការធ្វើការងារហ្នឹង ហើ​យ​ឆន្ទៈ​រប​ស់​យើ​ងនឹងនៅតែមោះ​មុ​ត​ និងនៅ​តែ​ព្យា​យា​ម​សិ​ក្សា​ស្រា​វ​ជ្រា​វ​ប​ន្ថែ​ម​ទៀតថា តើ​កា​ក​សំ​ណ​ល់នៅស្រុកខ្មែ​រ​យើ​​ង​ដែលវាមានច្រើនលើសលប់នឹងតើវា​អាចយក​ទៅ​ធ្វើ​អីបានដើ​ម្បី​ជួ​យ​ដ​​ល់បរិស្ថានអស់​នឹ​ង​ដើម្បីកុំឱ្យកខ្វក់ កុំឱ្យវាគគ្រិច ដល់បរិស្ថាន”។

តែយ៉ាងណាក៏ដោយ បច្ចុប្បន្ន តម្រូវការធ្យូងអនាម័យមិនសូវខ្ពស់ប៉ុន្មានទេ ដោយសារ​ប្រជា​ព​ល​រដ្ឋគាត់មិនទាន់មានការយល់ដឹងពីការប្រើប្រាស់ធ្យូងអនាម័យមាន​គុណតម្លៃ​ជួយ​ដ​ល់​​ការការពារបរិស្ថាន ហើយ​ម្យ៉ា​ង​ទៀ​ត​ប្រជាពលរដ្ឋគិត​ថាត​ម្លៃវាអាចថ្លៃជាងធ្យូ​ងព្រៃ​ប​ន្តិ​ច​ ​ឬ ផលិតផលធ្យូងអនាម័យនេះ ថ្មីសម្រាប់ប្រពលរដ្ឋ ដែលមិន​ទា​ន់​​បានសាកល្បង។ ប៉ុន្តែចង់មិន​ចង់ម្ចាស់សិប្បកម្មបានគូសបញ្ជាក់ថា ចាប់ពី​ពេល​នេះ​​ទៅ​​​បាន​​ចា​ប់ផ្តើមគិត​ហើ​យ​ថា តើផលិ​តផលធ្យូងនេះ​​វានឹង​អាចជ្រៀតចូ​លក្នុ​ងទីផ្សារ​បាន​ខ្លាំ​ង​ប៉ុ​ណ្ណា ថែមទាំងរកមធ្យោបាយ​ពន្យល់​អ្នកប្រើប្រាស់ឱ្យ​​យ​ល់​ដឹង​ពីអត្ថប្រយោជន៍របស់ធ្យូ​ងដែ​ល​អាច​ជួ​យកាត់​​បន្ថយ​ផលប៉ះពាល់ប​រិ​ស្ថា​ននិងការការពារបរិស្ថាន។ ទន្ទឹមនេះ ធ្យូងអនាម័យ វាអាចមាន​គុ​ណ​ស​ម្ប​ត្តិ​ច្រើ​ន​ជា​​ងធ្យូ​ង ​ព្រៃ ​ឧទាហរណ៍ថា ដុតទៅវាអត់ផ្ទុះ ផ្សែងហុយតិច ផលរំខានតិច មិ​ន​សូ​វ​មា​ន​ផេះច្រើនដូច​ធ្យូងព្រៃ ឆេះងំ​បា​​នយូរជាងធ្យូងព្រៃ និងអត់ប្រឡាក់ដៃជាដើម ។​

ទោះបីកាកសំណល់មានច្រើនប្រភេទអាចកែច្នៃបានក៏ពិតមែន ប៉ុន្តែជំហានដំបូង​សិ​ប្ប​ក​​ម្មធ្យូងអនាម័យ ​BF ទើបតែ​កែច្នៃ​ចេញពីត្រឡោកដូងប៉ុណ្ណោះ ជំហានបន្ទាប់ សិប្បកម្ម​នេះ​  នឹ​ង​​​សិក្សា​ប​ន្ថែ​មទៀត កែច្នៃពីឫ​ស្សី​ ពីកម្ទេចស្លឹកឈើព្រៃ ដែលគេគរចោល។

គិតរហូតមកដល់ពេលនេះ គឺដំណើរការបានរយៈពេលបួនខែហើយ នៃការឈានជើង​ចូលមកបង្កើតទីតាំងធំផលិតធ្យូងអនាម័យនៅខេត្តកំពង់ស្ពឺ ដែលម្ចាស់សិប្បកម្មមានមហិច្ឆតា​ចង់ពង្រីកសង្វាក់ផលិតកម្មឱ្យកាន់តែធំ បន្ទាប់ពីមើល​ឃើ​ញ​លំហទីផ្សារនិងតម្រូវការ​កុម្ម៉ង់​ទិញ​មានល្អលក្ខ​ណៈល្អប្រសើរជាង​ទីតាំងដំបូង​ដែល​បា​ន​ប​ង្កើ​តនៅខេត្តបាត់ដំប​ង កាលពីពីរ​ឆ្នាំមុន។

លោក កង វុត្ថា បានឱ្យដឹងទៀតថា “ឥឡូវធ្យូងយើងផលិតចែកចាយតែ​ក្នុងស្រុក​ប៉ុណ្ណោះ អត់​​ទា​ន់បា​ន​នាំចេញ​ទៅ​ក្រៅ​​ទេ យើងកំពុងសិក្សាទៅលើគុណភាព និងទីផ្សារនៅ​ខាងក្រៅ ពេល​​អ​នា​​គ​ត​ទៅ​នៅ​ពេលដែ​ល​យើ​​ងមានលទ្ធភាពក្នុងការកែច្នៃច្រើន គឺយើ​ង​នឹ​ង​ធ្វើ​ការសហការ​នាំ​ចេ​ញ​​ទៅ​ក្រៅ។ ជាមួយគ្នានេះ ក៏មាន​គេច​ង់​យ​ក​ទៅក្រៅប្រទេសដែរ តែលទ្ធ​ភាពនៃការកែច្នៃ​របស់​យើង​នៅមា​ន​ក​ម្រិ​តនៅឡើយ ហើ​យ​​វ​​ត្ថុធា​តុ​ដើ​ម​ស​ម្រា​ប់កែច្នៃ គឺយើង​ទើប​ប្រមូលបានតិចតួច។”

ជាមួយនឹងផលិតផលធ្យូងអនាម័យនេះ នៅក្នុង​រោ​ង​ច​ក្រ ​ម្ចាស់សិប្បកម្មមិនលក់​រា​យ​ទេ​ដោយសារមានអ្នកទទួលទិញផ្តាច់មុ​ខ និង​បានចុះ​កិច្ចសន្យា​ជាមួយគ្នាត្រឹមត្រូវហើយអ្នក​ទិញ​ផ្តាច់មុខនោះគាត់យកទៅចែកចាយបន្តនៅ​រាជ​ធា​នី​ភ្នំពេ​ញ ខេត្ដព្រះសីហនុ និងខេត្ដ​សៀមរាប។

ក្នុងមួយថ្ងៃសិប្បកម្ម BF​ផលិ​តបា​នធ្យូងអនាម័យបាន​ពីរ​តោ​ន​ ហើយក្នុងមួយ​​ខែ​អា​ច​​​ បា​ន​ប្រ​ហែ​ល​៣០តោន។ ចំពោះតម្លៃលើទីផ្សារដែលម្ចាស់​សិប្បកម្ម​កំណត់ជាមួយអ្នកចុះកិច្ច​សន្យាយកលក់បន្ត​ក្នុង​​​១​គីឡូក្រាម តម្លៃ១.៥០០រៀល ប៉ុន្តែអ្នកចុះកិច្ចសន្យាទិញអាច​លក់បន្ត​ក្នុង​តម្លៃកំ​ណត់​នេះ ​​ឬ​ថ្លៃ​ជា​​ង​នេះ​អា​ស្រ័​យលើការចរចា។ ចំពោះការដឹកចេញទៅលក់​មួយ  ជើ​ង ចន្លោះពី២​០ ទៅ​៣​០​តោ​ន​ ចាប់ពី​២​ស​ប្តាហ៍ទៅ​១​ខែ ​ដឹកចេញម្តងទៅតា​​ម​ការបញ្ជា​ទិញ។

ក្រៅពីនេះ ចំពោះទីផ្សារវិញ លោក វុត្ថា បានលើកឡើងថា ​នៅស្រុកយើង​មិន​មា​នដៃ​គូ​ប្រ​កួ​ត​ប្រ​​ជែង​ច្រើ​ន​ទេ ឬអាចមានដែរប៉ុន្តែនៅមានតិចតួចនៅឡើយ។ លោកសប្បាយចិត្ត បើសិនជាប្រ​ជា​​ពល​រ​ដ្ឋ​ដែលគាត់ចង់បានសិប្បកម្មខ្នាតតូច ឬចង់បង្កើតដូចលោកកំពុងធ្វើ ដើម្បី​ធ្វើឱ្យ​ជីវ​ភាព​ប្រជាពលរដ្ឋកម្ពុជាកាន់តែ​ល្អ​ប្រ​សើ​រ​ឡើ​ង​ ហើ​យលោកក៏សប្បាយចិត្តនឹ​ង  សហកា​រជាមួយ​គាត់​ទោះបីលោក​មិ​​​នមែនអ្នកជំនាញ​ប​ច្ចេ​កទេ​ស​មែន គ្រាន់តែបានដើរមុន បាន​​ដឹងពីរបៀបកែច្នៃបែបណា និង​លោក​អា​ច​ពន្យល់ប្រាប់ប្រជាពលរដ្ឋ ឬអ្នកចង់បើក​សិប្ប​កម្មធ្យូងអនាម័យនេះ ឱ្យអ​ស់​​ពី​ចិត្តដើម្បី​ជួយគាត់គ្រប់បែបយ៉ាងប្រសិនបើ​គា​ត់ត្រូវកា​រ ជំនួយ។ ប្រសិនបើមានតម្រូវការបែបនេះមែន​ ​លោ​កកា​ន់តែ​សប្បា​យ​ចិ​ត្ត​បើ​​សិនជាកិច្ច​ការ​ទាំងអស់នេះវាអាចរីកសាយភាយច្រើ​ន​ទៅធ្វើ​ឱ្យ​ម​នុ​ស្ស​គ្រ​ប់​គ្នាចាប់ផ្តើមយល់ដឹង​ពីគុណតម្លៃ​ នៃបរិស្ថាន។ លោកបញ្ជាក់បន្ថែមថា «ខ្ញុំមិនខ្លាចគេដណ្តើ​មទីផ្សារទេ ការ​រ​ក​ស៊ីបែបនេះ​កាល​ណាយើងមានដៃគូកាន់តែច្រើន យើងធ្វើការប្រកួតប្រជែ​ង​ក្នុ​​​ង​ទីផ្សារ​កា​ន់​តែ​ល្អ ហើយយើងរីក​រាយនឹងសហការព្រោះអាជីវកម្មបែបនេះយើងរកស៊ីមិនមែនមកធ្វើស​ង្រ្គា​មទេ កា​ល​ណា​យើង​រកស៊ីយើងត្រូវការដៃគូច្រើនដើម្បីជួយគ្នាទៅវិញទៅមក”។

តាមរយៈសិប្បកម្មធ្យូងអនាម័យBFនេះ លោក វុត្ថា សង្ឃឹមថា នឹងអាចជួយផ្តល់ការងារ កាន់​តែ​ច្រើ​នបន្ថែមទៀតដល់កសិករដែលកំ​ពុ​ង​រស់​នៅ​ទាំ​ងតំបន់នោះ និងជួយធ្វើឱ្យគោលន​យោបា​យកា​ត់បន្ថយភាពក្រីក្ររបស់រាជរដ្ឋាភិបាលកាន់តែមានប្រសិទ្ធភាព និងជួយលើក   ​ស្ទួ​យដល់ម៉ាក្រូសេដ្ឋកិច្ចជាតិ ហើយផលិតផលក្នុងស្រុកនេះនឹងមានមានលទ្ធភាព និងសមត្ថ​ភា​ព​ប្រ​កួ​តប្រជែងលើ​ទី​​ផ្សារជាតិនិងអន្តរជាតិកាន់តែខ្លាំង៕

អត្ថបទ៖ គង់ សិរីរ័ត្ន, រូបភាព៖ អ៊ុន រិទ្ធី

រក្សាសិទ្ធិគ្រប់យ៉ាងដោយក្រសួងព័ត៌មាន