​​អភិបាលខេត្តបន្ទាយមានជ័យរម្លឹកអាជ្ញាធរដែនដីកងកម្លាំងប្រដាប់អាវុធស្រុកថ្ម​ពួក ត្រូវបន្តរួមគ្នាការពារសន្តិភាព និងអភិវឌ្ឍន៍មូលដ្ឋាន

AKP បន្ទាយមានជ័យ ថ្ងៃទី២២ ខែតុលា ឆ្នាំ២០១៩ –អភិបាលខេត្តបន្ទាយមានជ័យ ឯកឧត្តម អ៊ុំ រាត្រី បានធ្វើការក្រើនរម្លឹកដោយជំរុញដល់​មន្ត្រី អាជ្ញាធរដែនដី កងកម្លាំងប្រដាប់អាវុធគ្រប់ជាន់ថ្នាក់នៅស្រុកថ្មពួក ត្រូវបន្តរួមគ្នាថែរក្សា ការពារសន្តិភាព និងអភិវឌ្ឍន៍មូលដ្ឋាន ឱ្យមានការរីកចម្រើន ធ្វើឱ្យប្រជាពលរដ្ឋរស់នៅប្រ កបដោយសេចក្ដីសុខសាន្ដ មានជីវភាពកាន់តែប្រសើរបន្ថែមទៀត។​

ការថ្លែងបែបនេះរបស់ឯកឧត្តម អ៊ុំ រាត្រីបានធ្វើឡើងក្នុងពិធីប្រកាសលោក ម៉ែន សោ ភ័ណ ​​​ចូលកាន់​មុខតំណែង​​​អភិបាលរង​ ​នៃ​គណៈ​អភិបាលស្រុកថ្មពួក​ ​នៅព្រឹក​ថ្ងៃអង្គារ​ ​៩រោច​ ​ខែអស្សុជ​ ​ឆ្នាំកុរ​ ​ឯកស័ក​ ​ព.ស​.​២៥៦៣​ ​ត្រូវនឹងថ្ងៃទី២២ ​ខែតុលា​ ឆ្នាំ២០១៩​នេះ។

ក្នុងឱកាសនោះឯកឧត្តម អ៊ុំ រាត្រី បានថ្លែងកោតសរសើរ និងវាយតម្លៃខ្ពស់ចំពោះក្រុម ប្រឹក្សា​ស្រុក គណៈអភិបាល​ស្រុក អាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់អាវុធគ្រប់ ប្រភេទ និង​អង្គភាពពាក់ព័ន្ធក្នុង​ស្រុកទាំងអស់ ដែលបានរួមសាមគ្គីសហការគ្នា ខិតខំប្រឹង ប្រែងយ៉ាងសកម្ម ក្នុងការអនុវត្តកម្មវិធីនយោបាយរបស់រាជរដ្ឋាភិបាលកម្ពុជា ដោយបានជំរុញ ការអភិវឌ្ឍ​ស្រុក ឱ្យមានការ​រីកចម្រើនលើគ្រប់វិស័យ និងរក្សាបាននូវសន្តិសុខសណ្ដាប់សាធា រណៈ សង្គមបានល្អប្រសើរ នាពេលកន្លងមកនេះ។​

​ជាមួយនេះដែរឯកឧត្តមក៏បានថ្លែងនូវការអបអរសាទរនិងបានផ្ដាំផ្ញើចំពោះ​អភិបាលរង​ស្រុកដែលទើបទទួលការតែងតាំងមុខតំណែងថ្មី ត្រូវប្រកាន់ខ្ជាប់នូវសាមគ្គីភាពផ្ទៃក្នុង និងត្រូវ​ខិតខំប្រឹងប្រែងសហការចូលរួមក្នុងដំណើរការអភិវឌ្ឍន៍មូលដ្ឋានឱ្យមានការផ្លាស់ប្តូររីកចម្រើនថែមទៀត។ដោយឡែកអាជ្ញាធរដែនដីគ្រប់លំដាប់ថ្នាក់និងកងកម្លាំងប្រដាប់អាវុធគ្រប់ប្រភេទត្រូវបន្តចាត់តាំងការអនុវត្តយុទ្ធនាការប្រយុទ្ធប្រឆាំងគ្រឿងញៀនខុសច្បាប់ និងគោលនយោ បាយភូមិឃុំមានសុវត្ថិភាពធ្វើយ៉ាងណាបង្ការទប់ស្កាត់និងបង្រ្កាបឱ្យបានចំពោះបទល្មើសគ្រប់ប្រភេទជាពិសេសបទល្មើសប្លន់ប្រដាប់អាវុធ គ្រឿងញៀន ល្បែងស៊ីសង និងត្រូវបន្តពង្រឹង កិច្ចសហប្រតិបត្តិការឱ្យបានល្អប្រសើរជាមួយប្រទេសជិតខាងយើងគឺប្រទេសថៃពិសេសស្រុកដែលមានភូមិសាស្ត្រជាប់គ្នា ដើម្បីរួមគ្នាថែរក្សាសន្តិសុខសណ្ដាប់ធ្នាប់ព្រំ​ដែននិងការបង្ការទប់ ស្កាត់បទល្មើសឆ្លងកាត់ព្រំដែនគ្រប់ប្រភេទ។ត្រូវបង្កើនការចុះធ្វើវេទិកាសាធារណៈស្តីពីគោលនយោបាយភូមិឃុំមានសុវត្ថិភាពឱ្យបានទូលំទូលាយ ដើម្បីធ្វើយ៉ាងណាឱ្យប្រជាពលរដ្ឋបាន យល់ច្បាស់ហើយចូលរួមទាំងអស់គ្នា។ ការងារដែលសំខាន់ទៀតនោះហើយត្រូវតែរួមគ្នាគិត រួមគ្នាធ្វើក្នុងការផ្តល់សេវារដ្ឋបាល និងសេវាសាធារណៈជូនដល់​ប្រជាពលរដ្ឋឱ្យបានលឿន ទាន់ពេលវេលា ដើម្បីបង្កើនជំនឿរបស់ប្រជាពលរដ្ឋលើការដឹកនាំ​របស់រាជរដ្ឋាភិបាលសំដៅ ចូលរួមអភិវឌ្ឍន៍មូលដ្ឋានយើងឱ្យកាន់តែមានការរីកចម្រើនថែម​ទៀត៕

ដោយ ឈុន សារ៉ាត