ឯកឧត្តម អ៊ាង សុផល្លែត ៖ ដើមឈើមួយដើម ជួយជីវិតសត្វលោកបានមួយ

AKP ភ្នំពេញ ថ្ងៃទី១៨ ខែកក្តដា ឆ្នាំ២០១៩ -«ដើមឈើមួយដើម ជួយជីវិតសត្វលោកបានមួយ»  នេះជាការលើកឡើង របស់ ឯកឧត្តម អ៊ាង សុផល្លែត រដ្ឋលេខាធិការក្រសួងបរិស្ថាន និងជាប្រធានក្រុមការងារថ្នាក់ជាតិចុះមូលដ្ឋានស្រុកអូររាំងឪ ខេត្តត្បូងឃ្មុំ នៅក្នុងពេលអញ្ជើញប្រគេន និងដាំកូនឈើ នៅក្នុងបរិវេណវត្តទួលសូភី ស្ថិតក្នុងភូមិទួលសូភី ឃុំទួលសូភី ស្រុកអូររាំងឪ ខេត្តត្បួងឃ្មុំ នារសៀលថ្ងៃពុធ ១រោច ខែអាសាឍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៧ ខែកក្កដា ឆ្នាំ២០១៩។

យោងលើអត្ថបទព័ត៌មានដែលចុះផ្សាយក្នុងបណ្តាញសង្គមរបស់ក្រសួងបរិស្ថានបានឱ្យដឹងបន្តថា ឯកឧត្តម អ៊ាងសុផល្លែត បានបញ្ជាក់បន្ថែមថា ការៀបចំដាំដើមឈើនាពេលនេះ គឺជាការចូលរួមចំណែកក្នុងការទប់ស្កាត់ ការពារនូវគ្រោះមហន្តរាយនានា និងចូលរួមបង្កើនគម្របព្រៃឈើបៃតងឡើងវិញ។ ជាមួយគ្នានេះការដាំដើមឈើបានឆ្លុះបញ្ចាំងឱ្យឃើញនូវការខិតខំប្រឹងប្រែងយ៉ាងសកម្មរបស់រាជរដ្ឋាភិបាល ក្នុងការចាត់វិធានការយ៉ាងម៉ឹងម៉ាត់ ដើម្បីគ្រប់គ្រង អភិរក្សធនធានព្រៃឈើ ធនធានធម្មជាតិជីវចម្រុះ ដើម្បីជួយថែរក្សាដំណើរការប្រព័ន្ធអេកូឡូស៊ី ចូលរួមក្នុងការកាត់បន្ថយឥទ្ធិពលអវិជ្ជមាន នៃការប្រែប្រួលអាកាសធាតុ កាត់បន្ថយគ្រោះធម្មជាតិនានា និងការស្រូបយកឧស្ម័នកាបូនិចពីបរិយាកាស។

ឯកឧត្តម អ៊ាង សុផល្លែត បានលើកទឹកចិត្តផងដែរដល់ប្រជាពលរដ្ឋទាំងអស់គ្នា ចាប់ផ្ដើមដោយមិនបង្អែបង្អង់ នូវផែនការសា្ដរព្រៃឈើ និងដាំឈើឡើងវិញ ដើម្បីរក្សាបាននូវលំនឹងបរិស្ថានធម្មជាតិ និងភោគសម្បត្ដិឱ្យកាន់តែមានសម្រស់ស្រស់បំព្រងសម្រាប់សង្គមជាតិទាំងមូល។នៅក្នុងឱកាសនេះ ឯកឧត្តម អ៊ាង សុផល្លែត បានអញ្ជើញប្រគេនព្រះសង្ឃ និងដាំកូនឈើបង្គ្រប់ចំនួន ១.០៧០ដើម នៅក្នុងបរិវេណវត្តទួលសូភី ជាមួយមន្ត្រីរាជការ កងកម្លាំងមានសមត្ថកិច្ចទាំងបីប្រភេទ ព្រះសង្ឃ ប្រជាពលរដ្ឋ លោកគ្រូអ្នកគ្រូ និងសិស្សានុ

សិស្ស ស្ថិតក្នុងភូមិទួលសូភី ឃុំទួលសូភី ស្រុកអូររាំងឪ ខេត្តត្បូងឃ្មុំ ជាច្រើននាក់។

បន្ទាប់មកទៀត ឯកឧត្តម រដ្ឋលេខាធិការក្រសួងបរិស្ថាន និងប្រតិភូ បានអញ្ជើញ   ទស្សនាអនុវិទ្យាល័យ ហ៊ុន សែន ទួលសូភី និងបានលើកទឹកចិត្តឱ្យគណៈគ្រប់គ្រងសាលាបន្តពង្រឹងការអនុវត្តគោលការណ៍សាលាមេត្រីបរិស្ថាននៅកម្ពុជា ដែលកន្លងមកសាលាបានទទួលបានការវាយតម្លៃល្អពីគណៈកម្មការអន្តរក្រសួង លើការអនុវត្តគោលការណ៍នេះតាំងពីឆ្នាំ២០១៧កន្លងមក ដែលធ្វើឱ្យសាលាមានសោភណភាពបៃតង និងមានការផ្សាភ្ជាប់គោលការណ៍បរិស្ថាន និងបំណិតជីវិតរបស់សិស្សពីសាលានិងទៅសហគមន៍ ៕

ដោយ ពេជ្រ ណារិទ្ធ