ឯកឧត្តម ជាវ តា​យ ដឹកនាំ​កិច្ចប្រជុំ​បូកសរុប​លទ្ធផល​ការងារ​ប្រចាំឆមាស​ទី​១ និង​លើក​ទិសដៅ​ការងារ​ឆមាស​ទី​២ របស់​សាខា​កាកបាទក្រហមកម្ពុជា ខេត្តកំពត​

​កំពត​៖ ព្រឹក​ថ្ងៃ​ព្រហស្បតិ៍ ៣​កើត ខែស្រាព​ណ៍ ឆ្នាំជូត ទោស័ក ព​.​ស​.២៥៦៤ ត្រូវ​នឹង​ថ្ងៃទី​២៣ ខែកក្កដា ឆ្នាំ​២០២០ សាខា​កាកបាទក្រហមកម្ពុជា ខេត្តកំពត បាន​បើក​កិច្ចប្រជុំ​បូកសរុប​លទ្ធផល​ការងារ​ប្រចាំឆមាស​ទី​១ និង​លើក​ទិសដៅ​ការងារ​ឆមាស​ទី​២ ក្រោម​អធិបតីភាព ឯកឧត្ដម ជាវ តា​យ អភិបាល​នៃ​គណៈ​អភិបាល​ខេត្តកំពត និង​ជា​ប្រធាន​គណៈកម្មាធិការ​សាខា​កាកបាទក្រហមកម្ពុជា​ខេត្តកំពត នៅ​សាលប្រជុំ​ទុរេន សាលាខេត្ត​កំពត​។ សមាសភាព​អញ្ជើញ​ចូលរួម​មាន​៖ សមាជិក សមាជិកា គណៈកម្មាធិការ​សាខា ប្រធានកិត្តិយស អនុសាខា​ក្រុង ស្រុក ប្រធាន​គណៈកម្មាធិការ​អនុសាខា​ក្រុង ស្រុក និង​ក្រុម​ប្រតិបត្តិ​សាខា​សរុប​ចំនួន​៣៨​រូប​។

​ឯកឧត្ដម ជាវ តា​យ បាន​មានប្រសាសន៍ថា ដោយមាន​ការយកចិត្ត​ទុកដាក់​ពី​សំណាក់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ជាពិសេស​សម្តេច​កិត្តិ​ព្រឹទ្ធ​បណ្ឌិត ប៊ុនរ៉ានី ហ៊ុន សែន ប្រធាន​កាកបាទក្រហមកម្ពុជា ក្នុងការ​តាមដាន​សុខទុក្ខ​បងប្អូន​ប្រជាពលរដ្ឋ​ងាយ​រងគ្រោះ ដោយ​មិន​ទុក​ឲ្យ​ប្រជាពលរដ្ឋ​ណា​ម្នាក់​រង​ទុក្ខ​ដោយ​មិនមាន​ការជួយជ្រោមជ្រែង​ពី​អាជ្ញាធរ និង​ថ្នាក់ដឹកនាំ​សាខា​កាកបាទក្រហមកម្ពុជា​រាជធានី ខេត្ត​ឡើយ​។ ក្នុងនោះ​សម្តេច​កិត្តិ​ព្រឹទ្ធ​បណ្ឌិត បានប្រគល់​អំណោយ​មក​សាខា​កាកបាទក្រហមកម្ពុជា​ខេត្តកំពត​រួមមាន អង្ករ​១៥​តោន ថវិកា​២០.០០០. ០០០៛ និង​អាវ​ពោង​ចំនួន​៣០០​អាវ​។

​ឯកឧត្តម​បាន​ថ្លែង​កោតសរសើរ ដល់​សមាជិក សមាជិកា គណៈកម្មាធិការ​សាខា ប្រធានកិត្តិយស អនុសាខា​ក្រុង ស្រុក ប្រធាន​គណៈកម្មាធិការ​អនុសាខា​ក្រុង ស្រុក និង​ក្រុម​ប្រតិបត្តិ មានការ​សហការ​ល្អ ក្នុងការ​អនុវត្ត​តួនាទី​ភារកិច្ច​ទទួលបាន​លទ្ធ​ផល​ល្អ និង​បន្ត​ខំប្រឹង​បន្ថែម ដើម្បីអោយ​សាខា​កាកបាទក្រហម​ខេត្ត​មានការ​រីកចម្រើន​ទៅមុខ និង​បន្ត​កៀរគរ​សប្បុរស​ជនជាតិ អន្តរជាតិ ក្រុមហ៊ុន​ឯកជន មន្ត្រីរាជការ ដើម្បី​ចូលរួម​ជា​វិភាគទាន​ទ្រទ្រង់​គាំទ្រ​សកម្មភាព​សាខា​កាកបាទក្រហមកម្ពុជា​ខេត្តកំពត ក្នុងការ​ជួយសង្គ្រោះ​បងប្អូន​ប្រជាពលរដ្ឋ​ងាយ​រងគ្រោះ ដែល​កំពុង​ជួប​នូវ​បញ្ហា​ខ្វះខាត​ក្នុង​ជីវភាព​ប្រចាំថ្ងៃ និង​ជួប​នូវ​គ្រោះមហន្តរាយ​ផ្សេងៗ​ទៀត ដែល​អាច​កើតមានឡើង​ជាយថាហេតុ​។​

​ក្នុងស្ថានភាព​ដែល​ពិភពលោក​ក៏ដូចជា កម្ពុជា​យើង​ជួប​វិបត្តិ​នូវ​ជំងឺ​កូ​វីត​១៩ ទាំង​ថ្នាក់ដឹកនាំ និង​សមាជិក សមាជិកា​សាខា​កាកបាទក្រហម​គ្រប់លំដាប់​ថ្នាក់​ក្នុង​ខេត្ត តែង​បានរួម​សហការគ្នា​ល្អ ជាមួយ​អាជ្ញាធរ នៅក្នុង​មូលដ្ឋាន​របស់ខ្លួន ដោយបាន​ដោះស្រាយ​ការខ្វះខាត​ជូន​ប្រជាពលរដ្ឋ​និង​ទប់ស្កាត់​ការឆ្លង​រីក​រាលដាល​ក្នុង​សហគមន៍​បាន​យ៉ាង​មាន​ប្រសិទ្ធភាព​។​

​ឆ្លៀត​ក្នង​ឱកាស​នោះ ឯកឧត្តម ប្រធាន​ក៏បាន​ថ្លែង​នូវ​អំណរគុណ​ចំពោះ ឯកឧត្តម លោកជំទាវ លោក​ឧក​ញ្ញ៉ា សប្បុរជន​គ្រប់​មជ្ឈដ្ឋាន​ដែល​កន្លងមក​តែង​បាន​ជួយឧបត្ថម្ភ​គាំទ្រ​ដល់​សាខា​កាកបាទក្រហម​ខេត្ត ជា​ថវិកា​ក្តី ជា​សម្ភារៈ​ក្តី ក្នុងការ​ជួយសង្គ្រោះ​បងប្អូន​ប្រជាពលរដ្ឋ​ដែល​ទទួលរង​គ្រោះ​ដោយ​គ្រោះធម្មជាតិ និង​ខ្វះខាត​នៅ​មូលដ្ឋាន​។​

​តាម​របាយការណ៍​លទ្ធ​ផល​ក្នុង​ឆមាស​ទី​១​ឆ្នាំ ២០២០​របស់​សាខា​កាកបាទក្រហមកម្ពុជា​ខេត្តកំពត​សម្រេចបាន ក្នុង​វិស័យ​ស្នូល​ទាំង​៤ ក្នុងនោះ​រួមមាន​ទី​១.​ការងារ​គ្រប់គ្រង​គ្រោះមហន្តរាយ​ទី ២.​ការងារ​សុខភាព​និង​ការថែទាំ​សុខភាព​ក្នុង​សហគមន៍ ទី ៣.​ការងារ​លើកកម្ពស់ គោលការណ៍​គ្រឹះ​និង​តម្លៃ​មនុស្សធម៌ និង​ទី ៤ ការអភិវឌ្ឍន៍​ស្ថាប័ន​និង​អភិវឌ្ឍ​ធនធាន ដែល​លទ្ធផល​ទាំងនេះ​បាន​ឆ្លើយតប​គ្រោះមហន្តរាយ​ហើយ​លទ្ធផល​ល្អប្រសើរ​ក្នុងនោះ​បានផ្ដល់​អំណោយ​មនុស្សធម៌​ជូន​ប្រជាពលរដ្ឋ​សរុប​បាន​ចំនួន​២៩១៤​គ្រួសារ​( ស្មើនឹង​៦៩% ប្រៀបធៀប​ឆ្នាំ​២០១៩) ក្នុងនោះ​បានផ្ដល់​ដោយ​អនុសាខា​ចំនួន ១២៤៣ គ្រួសារ​។​

​កិច្ចប្រជុំ​ក៏បាន​ដាក់​ទិសដៅ​បន្ត ជំរុញ​ការងារ​អភិវឌ្ឍន៍​សាខា​និង​អនុសាខា​ដែល​ក្នុងនោះ​គឺ​សកម្មភាព​ការគ្រប់គ្រង​និង​អភិវឌ្ឍន៍​ធនធានមនុស្ស និង​ការងាររដ្ឋបាល​និង​ហិរញ្ញកិច្ច ទំនាក់ទំនង​និង​កិច្ចសហប្រតិបត្តិការ និង​ការពិនិត្យ​តាមដាន​វាយតម្លៃ របាយការណ៍ របស់​សាខា​និង​អនុសាខា ដោយមាន​ផែនការ​សកម្មភាព​មួយ​ជាក់លាក់ និង​សាខា​មាន​ប្រព័ន្ធ​ពិនិត្យ​តាមដាន​វាយតម្លៃ​និង​របាយការណ៍​ដែលមាន​ប្រសិទ្ធភាព​និង​ទៀងទាត់​៕ ដោយ​៖ មន្ទីរ​ព័ត៌មាន​ខេត្តកំពត​