អំណោយមនុស្សធម៌ផ្ដល់ជូនជាបន្តបន្ទាប់ ដើម្បីទ្រទ្រង់ដល់សាខាកាកបាទក្រហមខេត្តកំពង់ចាម ជួយសង្គ្រោះប្រជាពលរដ្ឋ

(កំពង់ចាម)៖ អភិបាលខេត្តកំពង់ចាម និងជាប្រធានសាខាកាកបាទក្រហមខេត្ត លោក អ៊ុន ចាន់ដា នាព្រឹកថ្ងៃទី១៣ ខែឧសភា ឆ្នាំ២០២០ នៅទីស្នាក់ការសាខាកាកបាទក្រហមខេត្ត បានដឹកនាំកិច្ចជុំគណៈកម្មាធិការសាខាកាកបាទ ក្រហមខេត្ត ដើម្បីត្រួតពិនិត្យការងារទទួលវិភាគទានពីសប្បុរសជន ជួយទ្រទ្រង់ដល់សាខាកាកបាទក្រហមកម្ពុជាខេត្តកំពង់ចាម ដើម្បីទុកសង្គ្រោះប្រជាជនដែលជួបគ្រោះមហន្តរាយផ្សេងៗ ។

បន្ទាប់ពីកិច្ចប្រជុំបានបញ្ចប់ ប្រធានគណៈកម្មាធិការសាខាកាកបាទក្រហមខេត្ត លោក អ៊ុន ចាន់ដា បានទទួល អំណោយមនុស្សធម៌ពីសប្បុរសជន ដែលចូលរួមវិភាគទានជួយទ្រទ្រង់ដល់សាខាកាកបាទក្រហមកម្ពុជាខេត្តកំពង់ចាម ក្នុងឱកាសខួបលើកទី១៥៧ ទិវាពិភពលោក កាកបាទក្រហម អឌ្ឍចន្ទក្រហម ក្រោមប្រធានបទ “ខ្ញុំស្រលាញ់សន្តិភាព និងកាកបាទក្រហមកម្ពុជា” ។

ក្នុងឱកាសនោះដែរ សំណាងឱ្យ លោក ហ៊ុន ណេង សមាជិកអចិន្ត្រៃយ៏នៃរដ្ឋសភា អ្នកតំណាងរាស្រ្តមណ្ឌលខេត្តកំពង់ចាម និងជាប្រធានកិត្តិយសសាខាកាកបាទក្រហមកម្ពុជា ខេត្តកំពង់ចាម និងក្នុងនាមប្រធានគណៈកម្មាធិការសាខា លោក អ៊ុន ចាន់ដា បានថ្លែងអំណរគុណ យ៉ាងជ្រាលជ្រៅដល់ អស់លោក លោក ស្រី លោកឧកញ៉ា និងក្រុមការងារចុះជួយខេត្ត សមាជិកព្រឹទ្ធសភា រដ្ឋសភា មន្ត្រីរាជការ និងវិស័យឯកជនក្នុងខេត្តទាំង អស់ ដែលបានចូលរួមបរិច្ចាគវិភាគទានជួយទ្រទ្រង់ដល់សាខាកាកបាទក្រហមកម្ពុជាខេត្តនាពេលនេះ៕