ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ចុះសួរសុខទុក្ខ និងចែកអំណោយដល់ប្រជាពលរដ្ឋរងគ្រោះជំនន់ទឹកភ្លៀង នៅស្រុកកណ្តាលស្ទឹង

AKP កណ្តាល ថ្ងៃទី១៩ ខែតុលា ឆ្នាំ ២០២០–

នៅ ថ្ងៃ២កើត ខែកក្ដឹក ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃអាទិត្យ ទី១៨ ខែតុលា ឆ្នាំ២០២០ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកណ្តាល បានអញ្ជើញចុះសួរសុខទុក្ខ និងនាំយកអំណោយចែកជូនបងប្អូនប្រជាពលរដ្ឋរងគ្រោះជំនន់ទឹកភ្លៀង ចំនួន ៩២៥គ្រួសារ ស្ថិតនៅភូមិបុណ្ណា ឃុំព្រះពុទ្ធ ស្រុកកណ្តាលស្ទឹង ខេត្តកណ្តាល ។

ក្នុងឱកាសចុះចែកអំណោយជូនប្រជាពលរដ្ឋនោះ ឯកឧត្តមអគ្គបណ្ឌិតសភាចារ្យ បានពាំនាំប្រសាសន៍ផ្តាំផ្ញើសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដោយសម្តេចទាំងទ្វេតែងបានគិតគូរអំពីសុខទុក្ខរបស់បងប្អូនប្រជាពលរដ្ឋទាំងដោយក្តីនឹករលឹក ។
ឯកឧត្តមអគ្គបណ្ឌិតសភាចារ្យ បានមានប្រសាសន៍ទៀតថា ប្រជាពលរដ្ឋទាំងអស់ត្រូវថែរក្សាអនាម័យ និងការរស់នៅឱ្យបានល្អចៀសវាងនូវជំងឺផ្សេងៗ ជាពិសេសត្រូវចេះការពារនូវបញ្ហាជំងឺកូវីដ-១៩ ដែលពិភពលោកកំពុងប្រឈមមុខនឹងការឆ្លងរីករាលដាលយ៉ាងខ្លាំង ។

ជាមួយគ្នានេះអាជ្ញាធរគ្រប់លំដាប់ថ្នាក់ក្នុងខេត្ត ត្រូវយកចិត្តទុក្ខដាក់ក្នុងការជម្លៀសប្រជាពល រដ្ឋមកកាន់ទីទួលសុវត្ថិភាព ក្នុងខណៈដែលតំបន់នេះកំពុងរងការគំរាមកំហែងដោយទឹកជំនន់ ។ ឯកឧត្តម បានថ្លែងអំណរគុណយ៉ាងជ្រាលជ្រៅចំពោះសប្បុរសជនទាំងអស់ ដែលបានឧបត្ថម្ភដល់រាជរដ្ឋាភិបាល ដើម្បីជួយសង្គ្រោះប្រជាពលរដ្ឋយើងដែលកំពុងរងគ្រោះដោយទឹកជំនន់។ កាយវិការដ៏ប្រពៃទំាងនោះ បានបង្ហាញពីវប្បធម៌ចែករំលែក សាមគ្គីភាព និងការរួបរួមគ្នារបស់ប្រជាពលរដ្ឋកម្ពុជាយើង ដែលជានិច្ចកាលតែងតែជួយគ្នាទៅវិញទៅមក នៅគ្រប់កាលៈទេសៈ ជាពិសេស ក្នុងពេលយើងជួបគ្រោះអាសន្ន ។
ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី បានលើកទឹកចិត្តផងដែរដល់កងកម្លាំងមានសមត្ថកិច្ចទាំងអស់ ទាំងទាហាន នគរបាល កងរាជអាវុធហត្ថ ប្រជាការពារ និងអាជ្ញាធរមូលដ្ឋាន ត្រូវបន្តយកចិត្ដទុកដាក់ការពារទ្រព្យសម្បត្តិរបស់ប្រជាពលរដ្ឋ នៅតាមផ្ទះ ដែលត្រូវជម្លៀសមកកាន់ទីទួលសុវត្ថិភាព។ ចំណែកក្រុមគ្រូពេទ្យត្រូវបន្តតាមដាន និងពិនិត្យព្យាបាលប្រជាពលរដ្ឋ ដែលមានបញ្ហាសុខភាពនៅពេលនេះឱ្យបានល្អ។

សូមបញ្ជាក់ថា អំណោយដែលចែកជូនដល់គ្រួសាររងគ្រោះទាំង ៩២៥គ្រួសារ ដោយក្នុងមួយគ្រួសារៗទទួលបាន អង្ករ២៥គីឡូ ទឹកបរិសុទ្ធ១កេស ត្រីខ១យួរ ធុងចម្រោះទឹកស្អាត១ ឃីដ១កញ្ចប់ ក្នុងនោះមាន មុង១ ភួយ១ ក្រមា១ សាប៊ូ១ដុំ ៕ ដោយ ណយ នឿន (ប្រភព:រដ្ឋបាលខេត្តកណ្តាល)