អភិបាលខេត្តកំពង់ចាម ចុះពិនិត្យនិងពន្លឿន ការស្ថាបនាឡើងវិញ លូបង្ហូរទឹកចេញពីក្រុងកំពង់ចាម

វិទ្យុជាតិកម្ពុជា​៖

ឯកឧត្តម អ៊ុន ចាន់ដា អភិបាលខេត្តកំពង់ចាម នៅថ្ងៃទី១៤ ខែតុលាឆ្នាំ ២០២០  បានដឹកនាំមន្ត្រីជំនាញ មន្ទីរពាក់ព័ន្ធ្ធ ចុះពិនិត្យវឌ្ឍនភាពនៃការសាងសង់ប្រព័ន្ធលូបណ្តោះទឹកចេញពីក្រុងកំពង់ចាម ដែលបានស្រុតបាក់ កាលពីពេលកន្លងទៅ នៅចំណុចសួនច្បារមាត់ទន្លេ ស្ថិតក្នុងភូមិទី៣ សង្កាត់ វាលវង់ ក្រុងកំពង់ចាម ។

តាមមន្ត្រីរដ្ឋបាលសាលាខេត្តកំពង់ចាមបានឱ្យដឹងថា ដោយសារជំនន់ទឹកភ្លៀង បានធ្វើឱ្យទឹកទន្លេមេគង្គមានកំពស់ ១០,៦២ ម៉ែត្រ ពោលគឺឡើង ០,៣៤ ម៉ែត្រ គិតត្រឹមព្រឹកថ្ងៃទី១៤ ខែតុលា ឆ្នាំ២០២០។ ទន្ទឹមនឹងនេះ ឯកឧត្តមអភិបាលខេត្ត បានដឹកនាំមន្ត្រីមន្ទីរពាក់ព័ន្ធ ចុះពិនិត្យ ក្នុងគោលបំណងពន្លឿន ការសាងសង់ប្រព័ន្ធលូបណ្តោះទឹកចេញពីក្រុងកំពង់ចាម ដែលបានស្រុតបាក់ កាលពីពេលកន្លងទៅ នៅចំណុចសួនច្បារមាត់ទន្លេ ។ 

យ៉ាងណាក៏ដោយតាមមន្ត្រីបច្ចេកទេស បានឲ្យដឹងដែរថា បច្ចុប្បន្ននេះការស្ថាបនាប្រព័ន្ធលូបង្ហូរទឹកចេញពីក្រុងកំពង់ចាមបាន លទ្ធផលជាង២០ភាគរយហើយ ដោយចាក់បេតុងជុំវិញចង្កេះប្រព័ន្ធលូថ្មី និងចាក់បេតុងគ្របពីលើមួយជាន់ទៀតមានប្រវែង ៨០ ម៉ែត្រ ចាប់ពីមាត់អណ្ដូងលូចាស់ ទៅដល់ក្នុងទន្លេ ហើយត្រូវប្រើប្រាស់ប្រព័ន្ធលូមុខ៣ ដែលមុខកាត់លូនីមួយៗ មានទំហំ ០,៨ ម៉ែត្រ និងសង់អណ្ដូងលូបណ្ដែតចំនួន២បន្ថែមទៀតដើម្បីការពារការស្ទះទឹកហូរ។ 

គួររំលឹកផងដែរថា កាលពីវេលារំលងអាធ្រាត្រថ្ងៃទី ១៣ ខែកញ្ញា ឆ្នាំ២០២០កន្លងទៅ នៅចំណុចលូបង្ហូរទឹក នៃសួនច្បារមាត់ទន្លេនោះ បានបាក់ស្រុត ហើយករណីនោះ ត្រូវបានមន្ត្រីជំនាញសន្និដ្ឋានថា បណ្ដាលមកពីប្រព័ន្ធលូបង្ហូរទឹក មានសភាពចាស់ទ្រុឌទ្រោម  ពោលគឺប្រព័ន្ធលូនេះបានសាងសង់ឡើងតាំងពីជំនាន់អាណានិគមបារាំងមកម្ល៉េះ ម្យ៉ាងទៀតនៅ យប់កើតហេតុ គឺមានភ្លៀងធ្លាក់យ៉ាងខ្លាំងផងដែរ ៕