មន្ទីរកសិកម្មខេត្តត្បូងឃ្មុំជំរុញពលរដ្ឋឲ្យបង្កើនការដាំបន្លែបន្ថែមលើការធ្វើស្រែចម្ការ

វិទ្យុជាតិកម្ពុជា៖ ស្រីផល 21,08,2020


MC៖មន្ទីរកសិកម្ម រុក្ខាប្រមាញ់ និងនេសាទ ខេត្តត្បូងឃ្មុំ បានជំរុញប្រជាពលរដ្ឋឲ្យបង្កើនការដាំដំណាំបន្លែបន្ថែមពីលើការធ្វើស្រែចម្ការ ដើម្បីផ្គត់ផ្គង់តម្រូវការទីផ្សារក្នុងស្រុក និងលើកកម្ពស់ជីវភាពរបស់គ្រួសារ។
លោក ហេង ពិសិដ្ឋ ប្រធានមន្ទីរកសិកម្មខេត្តនេះ មានប្រសាសន៍ប្រាប់វិទ្យុជាតិកម្ពុជាថា អាជ្ញាធររួមទាំងមន្រ្តីពាក់ព័ន្ធបានចុះអប់រំផ្សព្វផ្សាយពីបច្ចេកទេសពីការដាំដុះដំណាំបន្លែ ដល់ប្រជាកសិករ ដើម្បីឲ្យឆាប់ទទួលបានផល។
សម្លេង៖ «យើងបានផ្ដល់ការបណ្ដុះបណ្ដាលផ្សព្វផ្សាយហើយយើងតាមដានគាត់ជាប្រចាំដើម្បីឲ្យគាត់ធ្វើយ៉ាងណាព្យាយាមប្រើប្រាស់រូបភាពជាបណ្ដុំ ឬសហគមន៍នេះ ដើម្បីផលិតបន្លែរបស់គាត់។ អញ្ចឹងយើងបានរៀបចំអាហ្នឹង ហើយរៀបចំឲ្យគាត់មានស្លាកសញ្ញាត្រឹមត្រូវ វាគឺជារឿងរបស់យើងកែប្រែទម្លាប់របស់គាត់ ព្រោះពីមុនមកទម្លាប់របស់គាត់មិនសូវយកទៅលក់ទេ អញ្ចឹងយើងបង្រៀនគាត់ឲ្យចេះលក់ខ្លួនឯងទៀត តាមរយៈការចុះកិច្ចសន្យាជាមួយក្រុមហ៊ុនទិញបន្លែធំៗ»។
លោកបន្តថា ខាងមន្ទីរ ព្រមទាំងមន្ត្រីពាក់ព័ន្ធបានណែនាំដល់ប្រជាកសិករឲ្យចងក្រងជាបណ្តុំ ងាយស្រួល​​ ក្នុងការបង្កើនការដាំដំណាំបន្លែ ដើម្បីបំពេញតម្រូវការសម្រាប់គ្រូសារផង និងក្នុងស្រុកផង ដោយក្នុងនោះបានចងក្រងជាបណ្តុំចំនួន១០ បណ្តុំ និង៥សហគមន៍ហើយ ។
លោកបានអំពាវនាវដល់ប្រជាកសិករទាំងអស់ ឲ្យប្រឹងប្រែងអនុវត្តបច្ចេកទេសការដាំដុះ តាមការណែនាំរបស់មន្ត្រីជំនាញ និងមានផែនការច្បាស់លាស់ ដើម្បីទទួលបានទិន្នផលខ្ពស់និងធានាសុវត្ថិភាពដល់អ្នកបរិភោគ។
លោកបានបន្ថែមថា រហូតមកដល់ពេលនេះ ប្រជាកសិករនៅក្នុងខេត្ត បានបង្កើនការដាំដំណាំបន្លែគ្រប់មុខមានដូចជា ស្ពៃ ត្រសក់ ននោង ត្រឡាច និង ត្រកួន នៅលើផ្ទៃដីសរុបប្រមាណជា៦០០ហិកតា ៕