មន្ទីរសុខាភិបាលខេត្តព្រះសីហនុ បើកយុទ្ធនាការដាក់ថ្នាំអាប៊ែតសម្លាប់បង្កូវទឹក មូសខ្លា

AKP ព្រះសីហនុ ថ្ងៃទី៣០ ខែមិថុនា ឆ្នាំ២០២០–

នៅថ្ងៃចន្ទ ៩កើត ខែអាសាឍ ឆ្នាំជូត ទោ ស័ក ព.ស. ២៥៦៤ ត្រូវនឹងថ្ងៃទី២៩ ខែមិថុនា ឆ្នាំ២០២០ ឯកឧត្តម គួច ចំរើន អភិបាលខេត្តនិងជាប្រធានគណៈកម្មាធិការសាខាកាកបាទកម្ពុជាខេត្តព្រះសីហនុ បានដឹកនាំសមាជិក សមាជិកាសាខា មន្រ្តីសាខា អ្នកស្មគ្រ័ចិត្ត អាជ្ញាធរដែនដី សហការជាមួយមន្ទីរសុខាភិបាលខេត្តធ្វើយុទ្ធនាការផ្សព្វផ្សាយ និងដាក់ថ្នាំអាបែត នៅក្នុងក្រុងព្រះសីហនុចំនួន ៤សង្កាត់ ដែលមាន ១៦ភូមិ ស្មើនឹង ១.៧៦៤ខ្នងផ្ទះ មានអ្នកស្ម័គ្រចិត្ត ៣០២នាក់ ស្រ្តី ១២៦នាក់ ។

ឯកឧត្តម គួច ចំរើន បានធ្វើការណែនាំដល់អ្នកចូលរួមធ្វើសកម្មភាពចុះដាក់ថ្នាំអាប៊ែតតាមខ្នងផ្ទះប្រជាពលរដ្ឋ ក្នុងគោលបំណងដើម្បីការពារបង្ការជំងឺគ្រុនឈាម ដែលអាចឆ្លងតាមរយៈមូសខ្លាខាំ និងប្រើខិតប័ណ្ណ និងបដា ហើយយុទ្ធនាការនេះត្រូវបានធ្វើឡើងទៅតាមក្រុមនីមួយៗគ្រប់ភូមិ ក្នុងក្រុងព្រះសីហនុ ដើម្បីផ្សព្វផ្សាយដល់ប្រជាពលរដ្ឋឱ្យមានការយល់ដឹងដូចជា៖ ១.ចូលរួមកំចាត់ដង្កូវទឹក មូសខ្លា និងធានាថា មិនមានដង្កូវទឹកនៅក្នុងបរិវេណផ្ទះសម្បែង តាមរយៈការកម្ទេចចោល និងលុបបំបាត់ចោលនូវរាល់វត្ថុដក់ទឹក ដែលមិនប្រើប្រាស់ ដូចជាសម្បកកង់ឡាន កង់ម៉ូតូ សម្បកកំប៉ុង ក្រឡ ពាង សម្បកដូង អាងទឹក ដែលមិនប្រើប្រាស់ និងវត្ថុអាចដក់ទឹកដទៃទៀត ដែលនៅជុំវិញបរិវេណផ្ទះរបស់លោកអ្នក ។ ត្រូវលាងសម្អាតសម្ភារ ឬវត្ថុប្រើប្រាស់ផ្សេងៗសម្រាប់ស្ដុកទឹកឱ្យបានពីរដងក្នុងមួយសប្ដាហ៍ ឬដាក់ថ្នាំអាបែត ត្រីប្រាំពីរពណ៌ ឬគ្របឱ្យបានត្រឹមត្រូវនូវពាង អាងទឹក ធុង ក្រឡ ថូផ្កា ចានទ្រជើងទូជាដើម ។ល។ ២.ត្រូវកំចាត់មូសខ្លា តាមរយៈរៀបចំសម្ភារក្នុងផ្ទះសម្បែងឱ្យមានសណ្ដាប់ធ្នាប់ ធ្វើយ៉ាងណាឱ្យមានពន្លឺចាំងចូលក្នុងផ្ទះបានល្អ លុបបំបាត់ព្រៃស៊ុបទ្រុបជុំវិញផ្ទះ និងចូលរួមសហការជាមួយភ្នាក់ងារសុខាភិបាល ក្នុងករណីមានការសង្ស័យ ត្រូវបាញ់ថ្នាំសម្លាប់មូសខ្លា ។ ៣. ត្រូវការពារខ្លួនកុំឱ្យមូសខ្លាញីខាំ តាមរយៈការដេកក្នុងមុង (ទាំងថ្ងៃទាំងយប់) ស្លៀកពាក់ខោអាវវែង មិនត្រូវអង្គុយ ឬសម្រាកនៅកន្លែងដែលមិនមានពន្លឺគ្រប់គ្រាន់ ។ ៤.បច្ចុប្បន្នករណីជំងឺគ្រុនឈាមចម្លងបងប្អូនប្រជាពលរដ្ឋមិនថាក្មេង ឬចាស់នោះទេ ត្រូវរួសរាន់ស្វែងរកសេវាថែទាំសុខភាព ដែលនៅជិតអ្នកបំផុត ដូចជា មណ្ឌលសុខភាព និងមន្ទីរពេទ្យ ក្នុងករណីក្រុមគ្រួសារណាម្នាក់មានសញ្ញាជំងឺ ដូចជាក្ដៅខ្លួន (ក្ដៅខ្លួនខ្លាំងភ្លាមៗ ៣៩អង្សាសេឡើង) និងសញ្ញាបន្ទាប់បន្សុំផ្សេងទៀត ដូចជា មុខក្រហម ឈឺក្បាល ឈឺក្រោមក្រឡង់ភ្នែក ឈឺសាច់ដុំ ឬសន្លាក់ ឈឺខ្លួន ស្នាមកន្ទួលក្រហមជាដើម ។ គ្រប់ករណីសង្ស័យជំងឺគ្រុនឈាម មិនត្រូវសាកល្បងព្យាបាលដោយខ្លួនឯង ឬការប្រើប្រាស់ថ្នាំប្រភេទ អាស្ពីរីន ឬអ៊ីប៉ុយព្រូហ្វែន ជាដាច់ខាត និងមិនត្រូវស្វែងរកសេវាថែទាំសុខភាពណាដែលមិនមានជំនាញវិជ្ជាជីវៈ ធ្វើការពិនិត្យព្យាបាលជំងឺគ្រុនឈាមឡើយ ។

ឯកឧត្តមប្រធានគណៈកម្មាធិការសាខាកាកបាទក្រហមខេត្ត ក៏បានជំរុញក្រុមការងារទាំងអស់ ចូលរួមអប់រំផ្សព្វផ្សាយដល់ប្រជាពលរដ្ឋពីវិធីកាត់បន្ថយហានិភ័យពីការឆ្លងជំងឺកូវីដ-១៩ ដើម្បីពង្រឹងការទប់ស្កាត់ការចម្លងក្នុងសហគមន៍ លើកកម្ពស់ការផ្លាស់ប្តូរទម្លាប់ធ្វើអនាម័យត្រូវយកចិត្តទុកដាក់ខ្ពស់ និងត្រូវមានអនាម័យជាប់ជាប្រចាំ ដោយលាងសម្អាតដៃឱ្យបានញឹកញាប់ជាមួយសាប៊ូ អាល់កុល ជែល ហើយប្រសិនបើចេញទៅទីសាធារណៈ ត្រូវពាក់ម៉ាស ឬក្រមាឱ្យបានជាប់ជានិច្ច និងត្រូវអនុវត្តន៍តាមការណែនាំរបស់ក្រសួងសុខាភិបាល ដើម្បីកុំឱ្យមានការឆ្លងជំងឺកូវីដ-១៩ ក្នុងសហគមន៍របស់យើង ៕ ដោយ៖ ងូ សុមុនី