លោក មូន ជំរុញឱ្យកូរ៉េខាងជើងបញ្ចប់សង្គ្រាមកូរ៉េជាផ្លូវការ ដោយព្រមានពីការឆ្លើយតបយ៉ាងម៉ឺងម៉ាត់ចំពោះការគំរាមកំហែង

AKP ភ្នំពេញ ថ្ងៃទី២៦ ខែមិថុនា ឆ្នាំ២០២០​ — កាលពីថ្ងៃព្រហស្បតិ៍ ប្រធានាធិបតីកូរ៉េខាងត្បូង លោក មូន ជេអ៊ីន បានអំពាវនាវដល់ប្រទេសកូរ៉េខាងជើងឱ្យចូលរួមក្នុងសកម្មភាពដ៏អង់អាចដើម្បីបញ្ចប់សង្គ្រាមកូរ៉េជាផ្លូវការ ក្នុងការឈានទៅរកសន្តិភាពរួម ជាមួយនឹងសារព្រមានដ៏ច្បាស់ដើម្បីរំលឹកដល់ជម្លោះដែលបានចាប់ផ្តើមកាលពី ៧ ទសវត្សរ៍មុនជាមួយនឹងដំណើរការសន្តិភាពរបស់កូរ៉េដែលផុយស្រួយ។

លោកបាននិយាយនៅក្នុងសុន្ទរកថាមួយ នៅឯពិធីរំលឹកខួបនៃសង្រ្គាមនៅឯមូលដ្ឋានទ័ពអាកាស សេអ៊ូលដែលជាបរិវេណយោធានៅភាគអាគ្នេយ៍នៃទីក្រុងសេអ៊ូលថា «យើងមិនអាចរំលឹកដល់សង្គ្រាមកូរ៉េក្នុងលក្ខណៈពិតប្រាកដនៅឡើយទេ។ ពីព្រោះសង្គ្រាមនៅតែមិនទាន់ដល់ទីបញ្ចប់»។

លោកបានចង្អុលបង្ហាញថា សង្គ្រាមរយៈពេលបីឆ្នាំបានបញ្ចប់នៅក្នុងបទឈប់បាញ់មួយ មិនមែនសន្ធិសញ្ញាសន្តិភាព ដែលបានធ្វើឱ្យកូរ៉េទាំងពីរមានបច្ចេកទេសក្នុងសង្គ្រាម ហើយប្រឈមមុខនឹងភាពតានតឹងផ្នែកយោធាយ៉ាងខ្លាំងម្តងហើយម្តងទៀត។

លោក មូន បានសម្តែងក្តីសង្ឃឹមថា កូរ៉េខាងជើងនឹងចាប់ផ្តើមយ៉ាងអង់អាចដើម្បីបញ្ចប់សង្រ្គាមដ៏សោកសៅបំផុតក្នុងប្រវត្តិសាស្ត្រពិភពលោក។

ថ្លែងក្នុងពិធីរំលឹកខួបលើកទី ៧០ នៃការផ្ទុះសង្គ្រាមនោះ លោកបានបញ្ជាក់ថា «ប្រសិនបើយើងនឹងនិយាយអំពីការបង្រួបបង្រួម យើងត្រូវទទួលបានសន្តិភាពជាមុនសិន ហើយបន្ទាប់ពីសន្តិភាពបានបន្តអស់រយៈពេលជាយូរមកហើយនោះ យើងនឹងអាចមើលឃើញទ្វារឆ្ពោះទៅរកការបង្រួបបង្រួម»។

លោកបានបញ្ជាក់សារជាថ្មីថា កូរ៉េខាងត្បូងគ្មានចេតនាបង្ខំប្រព័ន្ធរបស់ខ្លួនទៅលើប្រទេសជិតខាងកុម្មុយនិស្តនោះទេ ហើយលោកបានសង្កត់ធ្ងន់អំពីសារៈសំខាន់នៃការកសាងសន្តិភាពជាមុនសិន។

លោកបាននិយាយថា «យើងស្វែងរកសន្តិភាព និងមានបំណងរស់នៅជាមួយគ្នាឱ្យបានល្អ។ មុននឹងបន្តនិយាយអំពីការបង្រួបបង្រួម ខ្ញុំសង្ឃឹមថា យើងអាចក្លាយជាប្រទេសជិតខាងដែលរួសរាយរាក់ទាក់ជាមុនសិន»៕

(ប្រភព Yonhab បកប្រែដោយលោក យា ចិន្តាខន្តី)