សម្ដេចក្រឡាហោមជំរុញឱ្យមន្ត្រីក្រោមឱវាទអនុវត្តផែនការប្រចាំឆ្នាំ២០២០របស់ខ្លួនឲ្យមានប្រសិទ្ធភាព

វិទ្យុជាតិកម្ពុជា.៖លោកជួន បូណា
ភ្នំពេញ៖ សម្ដេចក្រឡាហោម ស ខេងឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃបានណែនាំឱ្យអគ្គនាយកដ្ឋាន​ពាក់ព័ន្ធ​ក្រោមចំណុះក្រសួងត្រូវខិតខំប្រឹងប្រែងរៀបចំ និងអនុវត្តផែនការសកម្មភាពប្រចាំឆ្នាំ២០២០នេះ ដើម្បីបំរើផលប្រយោចន៍ប្រជាជន និងសង្គមជាតិឱ្យមានប្រសិទ្ធភាព។

ថ្លែងក្នុងកិច្ចប្រជុំឆ្លងផែនការសកម្មភាពប្រចាំឆ្នាំ២០២០របស់អគ្គនាយកដ្ឋានពន្ធនាគារ និងអគ្គលេខាធិការដ្ឋាន ក្រសួងមហាផ្ទៃ នាព្រឹកទី២៣ ខែមិថុនា នៅទីស្ដីការក្រសួងមហាផ្ទៃ សម្តេចក្រឡាហម មានប្រសាសន៍ថា «ថ្វីត្បិតតែយើងមិនអាចអនុវត្តតាមផែនការសកម្មភាពបានទាំងស្រុង ប៉ុន្តែផែនការសកម្មភាពនេះចាត់ទុក ជាផែនទីសម្រាប់បង្ហាញផ្លូវនាឆ្នាំបន្តបន្ទាប់ ហើយសម្រាប់បញ្ហាប្រឈមនានា សម្តេចសង្ឃឹមថា អាចដោះស្រាយបាននៅឆ្នាំក្រោយ និងឆ្នាំបន្តបន្ទាប់ខាងមុខៗទៀត។
សម្ដេចក្រឡាហោម ស្នើឲ្យអង្គភាព និងអគ្គនាយកដ្ឋានពាក់ព័ន្ធឲ្យខិតខំប្រឹងប្រែងពង្រឹងគុណភាពអង្គភាព តាមរយៈធ្វើឱ្យមានគុណភាពមន្ត្រី ដោយប្រឹងប្រែងពង្រឹងការអនុវត្តតួនាទី និងភារកិច្ចរបស់ខ្លួន។
ឯកឧត្តមនាយឧត្តមសេនីយ៍សន្ដិបណ្ឌិត ចាន់ គឹមសេង អគ្គនាយក នៃអគ្គនាយកដ្ឋានពន្ធនាគារ បានមានប្រសាសន៍ថា ផែនការសកម្មភាពឆ្នាំ២០២០នេះ ត្រូវបានរៀបចំឡើងផ្អែកលើមូលដ្ឋានសំខាន់ៗរួមមាន៖ យុទ្ធសាស្ដ្រចតុកោណដំណាក់ កាលទី៤ របស់រាជរដ្ឋាភិបាល, ក្របខណ្ឌគោលនយោបាយ កំណែទម្រង់ពន្ធនាគារក្រសួងមហាផ្ទៃ, ផែនការយុទ្ធសាស្ដ្ររយៈពេល៥ឆ្នាំ (២០១៩-២០២៣) របស់អគ្គនាយកដ្ឋានពន្ធនាគារ, រចនាសម្ព័ន្ធតួនាទី ភារកិច្ចរបស់អគ្គនាយកដ្ឋានពន្ធនាគារ ដូចមានចែងក្នុងអនុក្រឹត្យ ស្ដីពីការរៀបចំ និងប្រព្រឹត្តិទៅ នៃក្រសួងមហាផ្ទៃ, ទិសដៅការងារឆ្នាំ២០២០ របស់ក្រសួងមហាផ្ទៃ ដែលបានដាក់ចេញក្នុងពិធីសន្និបាត កាលពីថ្ងៃទី១៩-២០ ខែកុម្ភៈ ឆ្នាំ២០២០, អនុសាសន៍ដឹកនាំដ៏ខ្ពង់ខ្ពស់របស់សម្ដេចក្រឡាហោម ស ខេង ឧបនាយរដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងស្មារតីអង្គប្រជុំក្រោមអធិបតីភាព ឯកឧត្តម រដ្ឋលេខាធិការប្រចាំការ នៅថ្ងៃទី១១ ខែមិថុនា ឆ្នាំ២០២០។
ដោយឡែកសម្រាប់ផែនសកម្មភាពប្រចាំឆ្នាំ២០២០ របស់អគ្គលេខាធិកាដ្ឋាន ក្រសួងមហាផ្ទៃ ឯកឧត្តម នាយឧត្តមសេនីយ៍ ប៉ោ ភក្តិ អគ្គលេខាធិការ នៃអគ្គលេខាធិការដ្ឋាន បានលើកឡើងថា គោលបំណង និងគោលដៅនៃផែនការសកម្មភាពនេះ គឺផ្ដោតសំខាន់ទៅលើការរៀបចំកែសម្រួលរបៀបរបបការងារ ការកសាងហេដ្ឋារចនាសម្ព័ន្ធចាំបាច់ ដើម្បីធានាប្រសិទ្ធភាព និងចីរភាពនៃប្រព័ន្ធប្រតិបត្តិការ ពិសេសពាក់ព័ន្ធនឹងវិស័យបច្ចេកវិទ្យាទូរគមនាគមន៍ និងព័ត៌មាន ការលើកកម្ពស់គុណភាព សមត្ថភាព និងក្រមសីលធម៌វិជ្ជាជីវៈរបស់មន្ត្រីរាជការ និងការលើកកម្ពស់ទំនាក់ទំនង ក៏ដូចជាកិច្ចសហប្រតិបត្តិការរវាងគ្រប់ភាគីពាក់ព័ន្ធ៕