ដំណាំស្វាយចន្ទីឆ្នាំនេះមានទីផ្សារល្អដែលធ្វើឲ្យកសិករទទួលបានផលចំណេញច្រើន

វិទ្យុជាតិកម្ពុជា៖ សេង សុផាន់ណា ថ្ងៃទី  ខែឧសភា ឆ្នាំ ២០២០

មន្ទីរកសិកម្មខេត្តព្រះវិហារ ដំណាំស្វាយចន្ទីឆ្នាំនេះមានទីផ្សារល្អដែលធ្វើឲ្យកសិករទទួលបានផលចំណេញច្រើន  ហើយអំពាវនាវឲ្យប្រជាកសិករពង្រីកផ្ទៃដីដាំដុះដំណាំស្វាយចន្ទីនេះឲ្យបានច្រើន ដើម្បីឆ្លើយតបទៅនឹងតម្រូវការទីផ្សាក្នុងស្រុកនិងក្រៅប្រទេស។
 លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ មានប្រសាសន៍ថា 

រយៈពេលប៉ុន្មានឆ្នាំចុងក្រោយនេះដំណាំចន្ទីមានតម្លៃនិងទីផ្សារល្អ បើយើងធៀបទៅនឹង៣ ឫ ៤ ឆ្នាំមុន។ លោកប្រធានមន្ទីរបានបញ្ជាក់ថា  ដោយសារតែតម្លៃទីផ្សារល្អបានធ្វើឲ្យបងប្អូនប្រជាកសិករដាំដំណាំ ប្រភេទនេះមានការសប្បាយចិត្ត ហើយធ្វើឲ្យជីវភាពរបស់ពួកគាត់កាន់តែប្រសើរជាងមុន។

លោកបញ្ជាក់ថា មន្ទីរក៏បានណែនាំឲ្យប្រជាកសិករដែលដំណាំស្វាយចន្ទីនេះគួរពង្រីកផ្ទៃដីដាំដុះឲ្យបានច្រើនដែលឆ្លើយតបទៅនឹងតម្រូវការទីផ្សាយ ហើយមន្ទីរក៏បានជួយផ្តល់បច្ចេកទេសក្នុងការដំាដុះ ដំណាំប្រភេទនេះឲ្យទទួលបានទន្និផលខ្ពស់ ហើយទទួលបានផលចំណេញច្រើន ខណៈដែរដំណាំស្វាយ ចន្ទីមានលក្ខណៈងាយស្រួលក្នុងការដាំនិងការថែទាំ  ដែលខុសប្លែកពីដំណាំផ្សេងៗដូចជា សណ្តែកបាយ សណ្តែកសៀង និងដំឡូងមី ដែលពុំសូវមានទីផ្សារ  ហើយចំណាយដើមទុនច្រើនក្នុងការដាំដុះ និងការថែទាំ ។«យើងឃើញថាល្អ បងប្អូនសប្បាយចិត្ត យើងជំរុញពូជថ្មីឲ្យមានទិន្នផលខ្ពស់  ហើយលក្ខខ័ណ្ឌនៅខេត្តព្រះវិហារ ដំណាំ ស្វាយចាន់ទីគឺដំណាំល្អ យើងជំរុញឲ្យវិស័យឯកជនមានការចូលរួម យើងមានក្រុមហ៊ុនវេចខ្ជាប់ ក្រុមហ៊ុនសាន់តនា ហើយកន្លងមកយើងបាននាំចេញទៅចិន វេចខ្ជាប់ទៅតាមស្តង់ដារនាំចេញ ហើយដោះស្រាយបញ្ហាទីផ្សានៅទីនោះមួយចំនួន មួយចំនួនទៀត យើងនាំជាគ្រាប់ចន្ទីចេញផងដែរ»។
  លោកបានបញ្ជាក់ថា បច្ចុប្បន្ននេះខេត្តព្រះវិហារមានផ្ទៃដីដាំដំណាំស្វាយចន្ទី ប្រមាណជាង  ១ម៉ឺនហិកតា ក្នុងនោះ ៦០ភាគរយ កំពុងប្រមូលផល។

សូមបញ្ជាក់ថាកាលពីឆ្នាំកន្លងទៅតម្លៃគ្រាប់ស្វាយចន្ទីគឺមានតម្លៃខ្ពស់គួរសមបើធៀបនឹងឆ្នាំកន្លងទៅ ដោយក្នុងឆ្នាំនេះ ក្រុមហ៊ុនបានបញ្ជាទិញគ្រាប់ស្វាយចន្ទីពីកសិករក្នុងតម្លៃចន្លោះពី ជាង១.៦៥០ ដុល្លារទៅ ២.០០០ ដុល្លារ ក្នុងមួយតោន៕