សម្ដេចពិជ័យសេនា ទៀ បាញ់ នឹងដឹកនាំគណៈប្រតិភូទៅចូលរួមកិច្ចប្រជុំចង្អៀត រដ្ឋមន្ដ្រីការពារជាតិអាស៊ាន

នៅវៀតណាមនៅថ្ងៃទី១៩ ខែកុម្ភៈ
វិទ្យុជាតិកម្ពុជា៖ លោក អាត ចន្ធូ
MC៖ សម្ដេចពិជ័យសេនា ទៀ បាញ់ នឹងដឹកនាំគណៈប្រតិភូទៅវៀតណាមនៅថ្ងៃទី១៩ ខែកុម្ភៈ នេះ ដើម្បីទៅចូលរួមកិច្ចប្រជុំចង្អៀត រដ្ឋមន្ត្រីការពារជាតិអាស៊ាន (ADMM Retreat) នៅទីក្រុងហាណូយ ។
តាមសេចក្ដីប្រកាសព័ត៌មានរបស់ក្រសួងការពារជាតិ ដែលបានចេញផ្សាយ នៅព្រឹកថ្ងៃទី១៧ ខែកុម្ភៈ ឆ្នាំ២០២០នេះ បានឱ្យដឹងថា តបតាមការអញ្ជើញឯកឧត្តម នាយឧត្តមសេនីយ៍ Ngo Xuan Lich រដ្ឋមន្ត្រីក្រសួងការពារនៃសាធារណរដ្ឋសង្គមនិយមវៀតណាម សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ នឹងដឹកនាំគណៈប្រតិភូទៅចូលរួមកិច្ចប្រជុំចង្អៀត រដ្ឋមន្ដ្រីការពារជាតិអាស៊ាន នៅទីក្រុងហាណូយ សាធារណរដ្ឋសង្គមនិយមវៀតណាម រយៈពេល២ថ្ងៃ ចាប់ពីថ្ងៃទី១៨ រហូតដល់ថ្ងៃទី២០ ខែកុម្ភៈ ឆ្នាំ២០២០។
ប្រភពដដែលបន្ដថា នៅក្នុងកិច្ចប្រជុំចង្អៀតរដ្ឋមន្ត្រីការពារជាតិអាស៊ាននេះ សម្តេចពិជ័យសេនា ទៀ បាញ់ នឹងចូលរួមផ្តល់នូវទស្សនៈស្តីពីបញ្ហាសន្តិសុខក្នុងតំបន់ និងពិភពលោក នៃផលប្រយោជន៍រួម ក៏ដូចជាកិច្ចសហប្រតិបត្តិការនាពេលអនាគតរបស់ ADMM និង ADMM បូក ដែលនឹងបម្រើជាគោលការណ៍ណែនាំសម្រាប់បន្តពិភាក្សា និងអនុវត្តដោយភ្នាក់ងារពាក់ព័ន្ធ។ ស្របគ្នានឹងកិច្ចប្រជុំនេះ សម្តេចពិជ័យសេនា ទៀ បាញ់ នឹងចូលរួមកិច្ចប្រជុំក្រៅផ្លូវការ រដ្ឋមន្ត្រីការពារជាតិអាស៊ាន អូស្រ្តាលី ដើម្បីផ្លាស់ប្តូរទស្សនៈស្តីពីបញ្ហាសន្តិសុខរួម ក៏ដូចជាការលើកកម្ពស់ទំនាក់ទំនងលើវិស័យការពារជាតិ រវាងអូស្ត្រាលី និងអាស៊ាន ជាពិសេសជាមួយរដ្ឋសមាជិកអាស៊ាននីមួយៗ។ បន្ថែមពីនោះសម្តេចពិជ័យសេនា ទៀ បាញ់ ក៏នឹងមានកិច្ចប្រជុំទ្វេភាគីជាមួយ រដ្ឋមន្ត្រីការពារជាតិ នៃបណ្តាប្រទេសអាស៊ានមួយចំនួនផងដែរ៕