មន្ទីរ​ធនធានទឹក​ និង​ឧតុនិយម​ខេត្តកំពង់ចាម ចុះអន្តរាគមន៍បូមទឹកសង្គ្រោះ ​ស្រូវប្រាំងបាន​ជិត៤០០ហិកតាក្នុងស្រុកបាធាយ

AKP កំពង់ចាម ថ្ងៃទី០២ ខែធ្នូ ឆ្នាំ២០១៩ — លោក អ៊ុម វិបុល ប្រធានមន្ទីរ​ធនធានទឹក​ និង​ឧតុនិយម​ខេត្តកំពង់ចាមបានឱ្យ ទីភ្នាក់ សារព័តមានកម្ពុជា “AKP” ដឹងនៅព្រឹកថ្ងៃចន្ទ ៦កើត ខែមិគសិរ  ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី០២ ខែធ្នូ ឆ្នាំ២០១៩ថា ​មន្ទីរធនធានទឹក និងឧតុនិមយ ខេត្តកំពង់ចាម ត្រូវធ្វើការតាមដានអំពីការងាបង្កបង្កើនផលរបស់ប្រជាកសិករទាំងស្រូវវស្សាចុងរដូវ និងស្រូវ រដូវប្រាំងអំពីបញ្ហាខ្វះខាតទឹកនោះ ត្រូវចុះជួយអន្តរាគមន៍ជូនប្រជាពលរដ្ឋជាបន្ទាន់។

លោកបន្តថា កាលពីថ្ងៃអាទិត្យទី០១ ខែធ្នូ ឆ្នាំ២០១៩ មន្ទីរ​ធនធានទឹក ​និង​ឧតុនិយម​ខេត្តកំពង់ចាម និងអាជ្ញាធរស្រុកបាធាយបានបញ្ចុះម៉ាស៊ីនបូមទឹកមានកម្លាំង២៥សេស ចំនួន៤ គ្រឿងចុះអន្តរាគមន៍បូបទឹកសង្គ្រោះដំណាំស្រូវរដូវប្រាំងរបស់ប្រជាកសិករប្រមាណ ៣៨៥ហិកតា នៅក្នុងភូមិតាំងរលៀងក្នុង ឃុំមេព្រីង របស់ស្រុកបាធាយ ខេត្តកំពង់ចាម ដែលកំពុងចេញផ្លែផ្កា ហើយជួបបញ្ហាខ្វះទឹក។

​លោក​ប្រធាន​មន្ទីរ​បាន​ឱ្យ​ដឹង​ទៀតថា នៅក្នុងឱកាសនោះលោក ក៏បានអំពាវនាវនិង ណែនាំ​ដល់​អាជ្ញាធរ​ជួយតាមដានពិនិត្យ​អំពីបញ្ហាទឹកតាមលទ្ធភាព​ជាក់ស្តែង​ អំពី​តម្រូវការ​ក្នុង ការ​ប្រើប្រាស់​ទឹក​របស់​ប្រជាពលរដ្ឋ​នៅ​មូលដ្ឋាន​ផ្ទាល់ និងបានសំណូមពរព្រមទាំងធ្វើការអប់រំ ផ្សព្វផ្សាយដល់ប្រជាពលរដ្ឋយើងអំពីស្ថានភាព នៃអាកាសធាតុរបស់ប្រទេសយើងនឹងទទួល នូវសម្ពាធ El Nino ធ្វើឱ្យយើងជួបភាពរាំងស្ងួតក្នុងរយៈពេលវែង របាយទឹកភ្លៀងធ្លាក់បាន អូសបន្លាយធ្វើឱ្យប្រឈមនឹងកង្វះខាតទឹកប្រើប្រាស់ ក៏ដូចការងារកសិកម្ម ដូចនេះប្រជា កសិករ​ត្រូវចេះ​ប្រើប្រាស់​ទឹក​ដោយ​សន្សំសំចៃ​ខ្ពស់ និងចូលរួមថែរក្សា​ការពារទឹកទុកទើប យើងដោះស្រាយនូវហានិភ័យនៃកង្វះខាតទឹក។

លោក អ៊ុម វិបុល បានឱ្យដឹងថា ក្នុងខេត្តកំពង់ចាម​មាន​ប្រព័ន្ធធារាសាស្ត្រ​សរុប​ចំនួន ២៦២កន្លែង បាន​ជួសជុល​ឡើងវិញ​ចំនួន៨៥​កន្លែង ​និង​ស្តារ​ប្រឡាយ​ប្រវែង​សរុប​ចំនួន​៣៩៧,៨២​គីឡូម៉ែត្រ ​សម្រាប់​​អន្តរាគមន៍​ជួ​យស​ង្រោះស្រូវ​រដូវប្រាំង និង​ស្រូវវស្សា​នៅពេល ជួប​បញ្ហា​ខ្វះទឹក។ នៅចុងរដូវវស្សាយើងបានធ្វើអន្តរាគមន៍បូបទឹកសង្គ្រោះស្រូវវស្សា បានចំនួនជាង១២០០០ហិកតាក្នុងស្រុកពីរគឺស្រុកស្រីសន្ធរ និងស្រុកព្រៃឈរ៕

ដោយ ឆាយ ម៉ុត