រដ្ឋាភិបាលស៊ុយអែត សម្រេចជួយអភិវឌ្ឍន៍នៅកម្ពុជា រយៈពេល៥ឆ្នាំបន្ថែមទៀត

វិទ្យុជាតិកម្ពុជា៖ លោកអាត់ ចន្ធូ

ភ្នំពេញ៖ រដ្ឋាភិបាលប្រទេសស៊ុយអែត សម្រេចជួយអភិវឌ្ឍន៍នៅកម្ពុជា រយៈពេល៥ឆ្នាំបន្ថែមទៀត ដើម្បីអោយកម្ពុជាកាន់តែមានភាពរីកចម្រើន ជាពិសេសប្រែក្លាយជាប្រទេសដែលមានចំណូលសេដ្ឋកិច្ចខ្ពស់។

ថ្លែងក្នុងឱកាសចូលជួបជម្រាបលាឯកឧត្ដម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្ដរជាតិ នៅថ្ងៃទី២៤ ខែកក្កដា លោកជំទាវ Maria Sargren ឯកអគ្គរដ្ឋទូតស៊ុយអ៊ែតដែលត្រូវចប់អាណត្តិប្រចាំនៅប្រទេសកម្ពុជា បានបញ្ជាក់ថា រដ្ឋាភិបាលប្រទេសខ្លួនកំពុងតែកសាងយុទ្ធសាស្ត្រអភិវឌ្ឍន៍នៅកម្ពុជា រយៈពេល៥ឆ្នាំទៀត ដោយគិតចាប់ពី ឆ្នា២០២០-២០២៤ខាងមុខនេះ ដើម្បីជួយដល់កម្ពុជាអោយកាន់តែមានភាពឿនលឿន និងប្រែក្លាយទៅជាប្រទេសដែលមានការអភិវឌ្ឍន៍ខ្ពស់ប្រកបដោយចីរភាព។

នេះបើតាមការឲ្យដឹងពីឯកឧត្តម កេត សោផាន់ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ ដែលបានប្រាប់អ្នកសារព័ត៌មាននៅក្រោយជំនួបទ្វេភាគីនេះ។
ឯកឧត្តម កេត សោផាន់ បានអោយដឹងទៀតថា លោកជំទាវឯកអគ្គរដ្ឋទូត បានលើកពីការប្ដេជ្ញាចិត្តបន្តជួយគាំទ្រដំណើរការអភិវឌ្ឍន៍នៅកម្ពុជាពីសំណាក់រដ្ឋាភិបាលស៊ុយអែត ក៏ដូចជារំលេចឲ្យឃើញនូវកិច្ចសហប្រតិបត្តិការទ្វេភាគី និងភាពជាដៃគូយ៉ាងល្អ រវាងរដ្ឋាភិបាលប្រទេសស៊ុយអែត និងរាជរដ្ឋាភិបាលកម្ពុជាផងដែរ ។

បើតាមការបញ្ជាក់របស់ឯកឧត្តម កេត សោផាន់ គឺឯកឧត្ដម ឧបនាយករដ្ឋមន្ត្រី ប្រាក់ សុខុន បានរំលឹកពីប្រទេសស៊ុយអែត ដែលធ្លាប់ផ្ដល់ជំនួយសហប្រតិបត្តិការ បោសសម្អាតមីននៅកម្ពុជា ចាប់តាំងពីឆ្នាំ២០១៤ ហើយសង្ឃឹមថា ស៊ុយអែតនឹងពិចារណាបន្តនូវគម្រោងជួយបោសសម្អាតមីននៅកម្ពុជាបន្ដទៀត បន្ទាប់ពីបានផ្អាកមួយរយៈ។ ឯកឧត្តម ឧបនាយករដ្ឋមន្ត្រី បានបន្តថា កម្ពុជា-ស៊ុយអែត បានប្ដេជ្ញារួមគ្នាក្នុងការជំរុញទំហំពាណិជ្ជកម្មរវាងប្រទេសទាំងពីរ ឲ្យកាន់តែមានទំហំធំជាងមុនថែមទៀត៕