អភិបាលខេត្តកំពង់ចាម ជំរុញ ឲ្យអាជ្ញាធរមូលដ្ឋាន ណែនាំដល់ប្រជាពលរដ្ឋមុនពេល សាងសង់លំនៅដ្ឋាន ត្រូវគិតគូរអំពីបច្ចេកទេស

វិទ្យុជាតិកម្ពុជា៖​ ដោយលោក ចិន សារ៉ាត ខេត្តកំពង់ចាម

ឯកឧត្តម គួច ចំរើន អភិបាលខេត្ត និងជាអនុប្រធានកិត្តិយសសាខា កាកបាទក្រហមកម្ពុជា ខេត្តកំពង់ចាម ជំរុញ ឲ្យអាជ្ញាធរមូលដ្ឋាន ណែនាំដល់ប្រជាពលរដ្ឋ ដែលសាងសង់លំនៅដ្ឋានថ្មីៗ ត្រូវយកចិត្តទុដាក់ខ្ពស់ចំពោះបច្ចេកទេសសាងសង់ ដើម្បី បញ្ជៀសការខាតបង់ពេលវេលា និងថវិកាគ្រួសារ ។ ការជំរុញបែបនេះបន្ទាប់ពីអគារមួយកន្លែងក្នុងក្រុងព្រះសីហនុបានបាក់រលំធ្វើអោយស្លាប់មនុស្សចំនួន២៨នាក់និងរងរបួសចំនួន២៦នាក់។


ក្នុងឳកាសដឹកនាំប្រតិភូ នាំអំណោយមនុស្សធម៌ កាកបាទក្រហមកម្ពុជា ចែកជូនពលរដ្ឋរងគ្រោះដោយខ្យល់កន្ត្រាក់ ចំនួន ៣៩គ្រួសារ ស្ថិតនៅភូមិព្រែកត្រណាក ឃុំរាយប៉ាយ ស្រុកកងមាស ខេត្តកំពង់ចាម កាលពីរសៀលថ្ងៃទី២៤ ខែមិថុនា ឆ្នាំ២០១៩ នេះ ឯកឧត្ដម គួច ចំរើន មានប្រសាសន៍ថា ឯកឧត្ដមនិងក្រុមការងារ បានចុះទៅពិនិត្យផ្ទាល់ នៃលំនៅដ្ឋាន របស់បងប្អូនប្រជាពលរដ្ឋ ១កន្លែង ដែលទើបតែសាងសង់ថ្មី ស្ថិតនៅក្នុងឃុំជីបាល ស្រុកស្រីសន្ធរ ដែលបានដួលរលំទាំងស្រុង ដោយសារកន្ត្រាក់នោះ ។


ឯកឧត្ដមថា បើតាមការពិនិត្យជាក់ស្ដែង គឺមូលហេតុរលំនេះ ដោយសារតែ ការសាងសង់លំនៅដ្ឋាននោះ ពុំបានអនុវត្តត្រឹមត្រូវ ទៅតាមលក្ខណៈបច្ចេកទេសនោះទេ ពីព្រោះថា ពិនិត្យទៅលើសសរបេតុង និងជើងតាង នៅផ្នែកខាងក្រោម ដែលបាក់នោះ វាមិនរឹងមាំទាល់តែសោះ ។ ឯកឧត្ដមអភិបាលខេត្ត មានប្រសាសន៍ថា ការចាក់បេតុង ដែលមានសរសរធំហើយ ពុំមែនមានន័យថា សុទ្ធតែរឹងមាំនោះទេ សំខាន់លើការសាងសង់ ឲ្យបានត្រូវទៅតាមបទដ្ឋាន បច្ចេកទេស ។

ការសាងសង់លំនៅដ្ឋាន មិនបានត្រឹមត្រូវទៅតាមបច្ចេកទេស នាំឲ្យខាតបង់ទាំងពេលវេលា និង ថវិកា ព្រោះថា បច្ចុប្បន្ននេះ អាកាសធាតុមានការប្រែប្រួល ដែលពិភពលោក បាននឹងកំពុងយកចិត្តទុកដាក់ ជាទីបំផុតនោះ ។


សូមបញ្ជាក់ថា អំណោយមនុស្សធម៌របស់សម្ដេចគតិព្រឹទ្ធបណ្ឌិត ប៊ុន រ៉ានី ហ៊ុនសែន ចែកជូនប្រជាពលរដ្ឋរងគ្រោះ ដោយខ្យល់កន្ត្រាក់ចំនួន ៣៩គ្រួសារ ស្ថិតនៅភូមិព្រែកត្រណាក ឃុំរាយប៉ាយ ស្រុកកងមាស ខេត្តកំពង់ចាម ក្នុងមួយគ្រួសារៗ ទទួលបានអង្ករ ២៥គីឡូក្រាម ឃីតមួយកញ្ចប់ មី ១កេស ទឹកស៊ីអ៊ីវ ៦ដប ទឹកត្រី ៦ដប ត្រីខ ១០កំប៉ុង និងថវិកា ១០ម៉ឺនរៀល ៕