រដ្ឋមន្ត្រីក្រសួងពាណិជ្ជកម្ម ជំរុញសហភាពអារ៉ាប់រួម វិនិយោគលើវិស័យសំខាន់ៗចំនួន៤ នៅកម្ពុជា

វិទ្យុជាតិកម្ពុជា​៖​ ដោយ​ លោក​ ហោ​ សេងគ្រី​៖

រដ្ឋមន្ត្រីក្រសួងពាណិជ្ជកម្មបានជំរុញអោយសហភាពអារ៉ាប់រួម ធ្វើការវិនិយោគនៅកម្ពុជា លើវិស័យសំខាន់ៗចំនួន ៤ រួមមាន កសិកម្ម ទេសចរណ៍ ឧស្សាហកម្ម និងហេដ្ឋារចនាសម្ព័ន្ធ ដើម្បី ពន្លឿនកំណើនសេដ្ឋកិច្ច និងកាត់បន្ថយភាពក្រីក្រ ស្របតាមយុទ្ធសាស្ត្រចតុកោណ ដំណាក់កាលទី៤ របស់រាជរដ្ឋាភិបាល។

ឯកឧត្តម ប៉ាន សូរស័ក្តិរដ្ឋមន្ត្រីក្រសួងពាណិជ្ជកម្មកម្ពុជា បានលើកសំណើនេះឡើង នៅក្នុងជំនួបពិភាក្សាទ្វេភាគីជាមួយ លោកជំទាវ រីម អាល់ ហាស្ហីមី (REEM Al Hashimy) រដ្ឋមន្រ្តីក្រសួងសហប្រតិបត្តិការអន្តរជាតិ និងជាប្រធានរៀបចំពិព័រណ៍ពិភពលោកឌុយបៃ ឆ្នាំ២០២០ នៃប្រទេសសហភាពអារ៉ាប់រួម កាលពីព្រឹកថ្ងៃ ទី២៧ ខែវិច្ឆិកា ឆ្នាំ២០១៨ ដើម្បីពង្រឹងទំនាក់ទំនងសេដ្ឋកិច្ច និងពាណិជ្ជកម្ម។

តាមរយៈផេករបស់ក្រសួងពាណិជ្ជកម្ម ឯកឧត្តម ប៉ាន សូរស័ក្តិ បានជម្រាបជូនលោកជំទាវ រីម អាល់ ហាស្ហីមី អំពីវឌ្ឍនភាពនៃកំណើនសេដ្ឋកិច្ចកម្ពុជា ចក្ខុវិស័យរបស់រាជរដ្ឋាភិបាល យុទ្ធសាស្ត្រចតុកោណដំណាក់កាលទី៤ គោលនយោបាយគាំពារវិនិយោគ និងគោលការណ៍លើកទឹកចិត្តផ្សេងៗ ដែលរាជរដ្ឋាភិបាលបានផ្តល់ជូនវិនិយោគិនបរទេស ដែលកំពុងធ្វើធុរកិច្ចនៅកម្ពុជា។ឯកឧត្តមរដ្ឋមន្រ្តី ក៏បានអញ្ជើញភាគីសហភាពអារ៉ាប់រួម ចូលរួមព្រឹត្តិការណ៍ “ពិព័រណ៍ផលិតផលខ្មែរ និងផលិតផលនាំចេញ-នាំចូលកម្ពុជា” កម្រិតអន្តរជាតិ ដែលគ្រោងនឹងរៀបចំឡើង នៅក្នុងខែធ្នូ ឆ្នាំ២០១៩ ដើម្បីស្វែងរកដៃគូពាណិជ្ជកម្ម និងផ្សព្វផ្សាយព្រឹត្តិការណ៍ពិព័រណ៍ពិភពលោកឌុយបៃ២០២០ ដល់ប្រជាជនកម្ពុជា និងប្រជាជននៃប្រទេសអាស៊ាន។

ជាការឆ្លើយតប លោកជំទាវរដ្ឋមន្ត្រី រីម អាល់ ហាស្ហីមី បានថ្លែងអំណរគុណដល់ ឯកឧត្តម ប៉ាន សូរស័ក្តិ ដែលបានចែករំលែកព័ត៌មានល្អៗ ទាក់ទងនឹងឱកាសវិនិយោគនៅកម្ពុជា និងបានសន្យាជួយជំរុញវិស័យឯកជនប្រទេសសហភាពអារ៉ាប់រួម ចូលមកសិក្សាអំពីលទ្ធភាពវិនិយោគនៅកម្ពុជា ក៏ដូចជាចូលរួមពិព័រណ៍ដែលរៀបចំឡើងដោយក្រសួងពាណិជ្ជកម្ម។

លើសពីនោះទៀត លោកជំទាវ រីម អាល់ ហាស្ហីមី បានបង្ហាញចេតនា មកបំពេញទស្សនកិច្ចនៅ កម្ពុជាក្នុងពេលឆាប់ៗខាងមុខ ដើម្បីស្វែងយល់កាន់តែច្បាស់ពីសក្តានុពលនៃវិស័យទេសចរណ៍ និងវប្បធម៌ដ៏សំបូរបែបរបស់កម្ពុជា សំដៅពង្រឹងទំនាក់ទំនងការទូត និងកិច្ចសហប្រតិបត្តិការរវាងប្រទេសទាំងពីរ៕